Fylkestinget i Møre og Romsdal har i lengre tid vore uroa over politisituasjonen i fylket. Politistillingar står ledige fordi politidistrikta treng pengar til løpande driftsutgifter. Begge politidistrikta i Møre og Romsdal ligg godt under målet om 2 politistillingar pr. 1000 innbyggjarar, som er eit mål sett av regjeringa i rapporten «Politi 2020». Nordmøre og Romsdal treng over 70 stillingar og Sunnmøre manglar 100 stillingar for å oppfylle dette målet. Sunnmøre politidistrikt er det politidistriktet i Norge som får minst pengar pr. innbyggjar og som har færrast politifolk pr. innbyggjar.

Dei tragiske hendingane den 22. juli i år sette fokus på betydinga av lokalt politi, utrykkingstid og beredskap. Fylkestinget er nøgd med at det i statsbudsjettet blir lagt opp til auka rammer for politiet totalt sett, m.a. styrking av terrorberedskapen og drifta av Sea King redningshelikoptra.

Fylkestinget er likevel kritiske til fordelinga av ekstramidlane til politiet. På vegner av innbyggjarane i Møre og Romsdal vil fylkestinget sterkt beklage at dei auka rammene i liten grad kjem våre politidistrikt til gode. Også i vårt fylke er det behov for å styrke beredskapen. Lønns- og prisvekst samt utbygging av naudnettet og store investeringar i datateknologi krev heile ekstraløyvinga og vel så det. For politidistrikta i Møre og Romsdal inneber forslaget til stasbudsjett ei reell innstramming av drifta, dvs. ei nedbemanning eller nedlegging av lensmannskontor.

Forslaget til statsbudsjett vidarefører dermed den nedbygginga vi har hatt i politiberedskapen i Møre og Romsdal. Vi har i dag berre 60 prosent av dei politistillingane som er sett som mål for politidistrikta. Underdekninga går ikkje berre ut over nedkjemping og førebygging av kriminalitet, men kan også gå på kostnad av innbyggjarane sin rettstryggleik. 

Fylkestinget krev at opptrappinga mot 2 polititenestemenn pr. 1000 innbyggjar blir følgt opp i statsbudsjettet. Eksisterande kriteriemodell for fordeling av midlar må også endrast. Det er i dag ein uakseptabel politiberedskap i Møre og Romsdal. Vi fryktar at responstida for politiet vil bli altfor lang i ein eventuell katastrofesituasjon.

Fylkestinget i Møre og Romsdal krev at Stortinget aukar løyvingane til politiet i distrikta når 2012-budsjettet skal vedtakast.