Friluftslivområde
Frå 1. januar 2010 fekk fylkeskommunen eit utvida ansvar for allment friluftsliv og forvaltning av friluftslivområde. Fylkeskommunen har etter dette ei oppgåve som talsmann og vaktmann for allemannsretten, mellom anna ved å informera om allemannsretten og ivareta allmenta sine interesser gjennom handsaming av saker om arealdisponering. Friluftslivet sitt arealbehov skal sikrast gjennom uttale, og om naudsynt motsegn, til kommunale planar og byggesaker. Denne oppgåva deler fylkeskommunen med fylkesmannen.
Fylkeskommunen skal motivera kommunane til å ta vare på grøntområde og markaområde og leggje til rette for friluftsliv gjennom planlegginga. Plan- og analyseavdelinga samarbeider med kommunane om å kvalitetssikre og prioritere søknader om sikring av friluftslivområde til Direktoratet for naturforvaltning. Informasjon om tilskotsordningane for statleg medverknad til sikring av friluftslivområde finn du under menyen Sikring av friluftslivområde.
Plan- og analyseavdelinga skal også, i samarbeid med kommunane og friluftsråda, sørgje for at det vert utarbeidd forvaltningsplanar for sikra friluftslivområde og at oppdatert og kvalitetssikra informasjon om alle områda er tilgjengeleg i nasjonale databasar som Naturbase. Fylkeskommunen arbeider med å betra kunnskapsgrunnlaget om friluftslivområde i fylket, mellom anna som eit bidrag til ny nasjonal handlingsplan for friluftsområde. Sjå under menyen Nasjonal handlingsplan.
Fylkeskommunen administrerer vidare tilskotsordningane for tiltak i sikra friluftslivområde og generelle friluftslivstiltak (stimulering og tilrettelegging for friluftsaktivitet). Ansvaret for desse postane ligg til kulturavdelinga i fylkeskommunen.
