Møre og Romsdal fylkeskommune arrangerer kvar månad regionalt planforum. Planforum er forankra i plan- og bygningslova:

Føremål:
Planforum skal drøfte konkrete plansaker og medverke til gjensidig informasjon og avklaring av konkrete spørsmål og sektorinteresser. Det skal også sikre samordning av ulike interesser og syn, raskare avklaring og ein meir samstemt praksis i plansaker. Regionalt planforum skal styrke planlegginga generelt og førebyggje konfliktar.

Sakstyper:
Alle kommuneplanar som skal rullerast bør leggjast fram i regionalt planforum. Også kommunale planstrategiar, interkommunale planar, enkelte kommunedelplanar og større reguleringsplanar vil vera aktuelle å ta opp. Det same gjeld regionale planstrategiar, regionale planar, regionale planbestemmingar og andre saker av overordna prinsippiell karakter.

Det er ønskeleg at kommuneplanar og regionale planar vert drøfta to gongar; før planprogram vert fastsett og før offentleg ettersyn.

Praktisk gjennomføring:
Møre og Romsdal fylkeskommune v/ Plan- og analyseavdelinga er sekretariat og ansvarleg for innkalling, drift, møteleiing og referat.

Planforum vert halde på fylkeshuset med mindre anna er avtalt. Kommunane deltek på den måten dei sjølve finn tenleg ut frå saken dei har meldt inn.

Kommunar og regionale etatar som ønskjer å ta opp saker må melde desse inn for fylkeskommunen seinast 14 dagar før møtet. Relevante saksdokument må sendast elektronisk seinast 7 dagar før møtet. Plan- og analyseavdelinga distribuerer vidare og kallar inn til møte.