Skal, skal ikke, skal!

Tirsdag 15. november gjekk hoppid.no-kurset Skal, skal ikke av stabelen. Hensikten med kurset er å få ei avklaring på om forretningsideen er "god nok", og kva som skal til for å starte eigen verksamheit. Det var Triangel AS som var kurshaldar og det var omlag 10 deltakarar på kurset.

Kundar som ventar
Martin Venås frå Kristiansund er allereie i gang. Han startar opp med bybud og snøbrøyting, og bestillingane ligg på bordet.
- Snøbrøyting er ikkje noko nytt, men eg har utvikla eit system der eg bruker ein firhjuling i staden for traktor. Då kjem eg lettare til, og folk slepp å få hekkane og buskane sine øydelagte.
Dagen har han brukt til å diskutere ideen sin med dei andre kursdeltakarane og til å ta den endelege bestemmelsen.
- Eg fekk den bekreftelsen eg trengte, seier han.

- Snakk med hoppid.no kontakten i kommunen
Christina Krogstad frå Haddal har ein så fersk forretningsidé at ho helst ikkje vil røpe den. Ho bur i Volda og har vore i dialog med banken og med hoppid.no kontoret i kommunen.
- Eg må anbefale alle som lurer på om dei skal starte bedrift om å ta kontakt med sitt lokale hoppid.no kontor. Eg har fått veldig god hjelp og svar på mange spørsmål, seier ho.
Mange gode svar har ho også fått i løpet av avklaringskurset Skal, skal ikke.
- Noko av det viktigaste eg har fått ut av dagen i dag, er at eg ser at det er muleg å starte bedrift. Det er mange ting å ta tak i, men det er fullt muleg, seier ho.

Må dekke eit behov i markedet
Kursleiar Roald Fiksdal (til venstre) i Triangel AS skryt av kursgjengen i dag, men seier at den største feilen mange gründerar generelt gjer, er å starte opp utan å vere budd. Mange er utålmodige etter å komme i gang og arbeider ikkje godt nok med forretningsideen.
- Det er viktig å ha ein god forretnignsidé og viktig å finne kva som er det unike. Men det er like viktig å tenke på at ideen din skal dekke eit behov hos kunden. Det må være betalingsvilje i markedet, seier han.

Leiareigenskapar
I løpet av kursdagen har deltakarane vore innom det praktiske rundt det å starte opp og dei ulike selskapsformene. I tillegg har det handla om kva det vil sei å være bedriftsleiar.
- Vi har også snakka ein del om dei kvalitetane ein leiar bør ha. Som leiar kan du ikkje vere god på alt, men det handlar om å kjenne seg sjølv, og sjå kva du kan og kva område du treng å hente inn kunnskap på, seier Fiksdal.

Sjå hoppid.no sin kurskalender for neste tilsvarande kurs.