Tre nye næringshagar inn i nytt næringshageprogram

Regjeringa styrka næringshageprogrammet i statsbudsjettet for 2012 og forsterka fokuset på verdiskaping. Det nye næringshageprogrammet er ei 10-årig satsing, med midtveisevaluering etter fem år. Det er stor interesse for og hard konkurranse om å delta i det nye programmet. Hovudmål for det nye næringshageprogrammet er auka verdiskaping, og det blir lagt vekt på innovasjon og å få fram fleire gründerar. SIVA finansierer 50 prosent av utviklingsressursen i næringshagen,  Møre og Romsdal fylkeskommune bidrar med 25 prosent, og bedriftene i hagen forpliktar seg på 25 prosent.

Fire frå Møre og Romsdal
- Sunnmøre kulturnæringshage i Volda vart med i programmet i juli 2011, og dermed er det no totalt fire næringshagar frå Møre og Romsdal som er med, noko vi er veldig glad for, seier regional- og næringssjef Bergljot Landstad. 

- Næringshagar, kunnskapsparkar og industriinkubatorar er viktige utviklingsmiljø for nye bedrifter og knoppskyting frå etablerte bedrifter. Her blir gründerar og nyetablerte bedrifter del av eit innovasjonsmiljø og kunnskapsnettverk. Vi har stor tru på dei næringshagane som nå har kome med i det nye næringshageprogrammet, seier ho.

Regjeringa trur at samlokalisering av små bedrifter i eit tverrfagleg miljø kan stimulere til kreativitet og pågangsmot, heiter det i ei pressemelding frå Kommunal og regionaldepartementet.

Føniks Næringshage AS er ein nyoppretta næringshage i Vestnes kommune. Næringshagen har sitt opphav i gründermiljøet på Daugstad i Vestnes kommune. Bølgen Næringshage AS blei etablert i 2000 og samlokaliserar 20 ulike bedrifter i lokalmiljøet. Aura Næringshage i Sunndal og Nesset har eit spanande bedriftsmiljø og veksande nettverk for kunnskapsintensive bedrifter. Sunnmøre kulturnæringshage i Volda er storsatsing på næringsutvikling på søre Sunnmøre.