Fylkeskommunen har eit ansvar for allment friluftsliv og forvalting av friluftslivområde. Etter forvaltningsreforma har fylkeskommunen ei oppgåve som talsmann og vaktmann for allemannsretten, mellom anna ved å informera om allemannsretten og ivareta allmenta sine interesser gjennom handsaming av saker etter plan- og bygningslova. Friluftslivet sitt arealbehov skal sikrast gjennom tilrådingar, og om naudsynt motsegn, til kommunale planar og byggesaker. Denne oppgåva deler fylkeskommunen med fylkesmannen.

Fylkeskommunen skal motivere kommunane til å ta vare på grøntområde og markaområde og leggje til rette for friluftsliv gjennom planlegginga. Plan- og analyseavdelinga samarbeider med kommunane om å kvalitetssikre og prioritere søknader om sikring av friluftslivområde til Miljødirektoratet. Informasjon om tilskotsordningane for statleg medverknad til sikring av friluftslivområde finn du under menyen Sikring av friluftslivområde.

Plan- og analyseavdelinga skal også, i samarbeid med kommunane og friluftsråda, sørgje for at det vert utarbeidd forvaltningsplanar for sikra friluftslivområde og at oppdatert og kvalitetssikra informasjon om alle områda er tilgjengeleg i nasjonale databasar som Naturbase. Fylkeskommunen arbeider med å betra kunnskapsgrunnlaget, mellom anna gjennom samarbeid med kommunane om kartlegging og verdsetting av friluftslivområde.

Fylkeskommunen forvaltar tilskotsordningar for tiltak i sikra friluftslivområde og generelle friluftslivstiltak (stimulering og tilrettelegging for friluftsaktivitet). Ansvaret for desse postane ligg til kulturavdelinga i fylkeskommunen, og du kan lese meir om desse her.