Karrieredagane 2023 - Indre Nordmøre
Indre Nordmøre
Velkommen til karrieredagane 2023 for elevar på 10. trinn
I samarbeid med sentrale aktørar frå opplæring, arbeidsliv, kommunar og organisasjonar inviterer Møre og Romsdal fylkeskommune alle ungdomar på 10. trinn til å vere med på Karrieredagane 2023.
Målsettingane med Karrieredagane er at:
- Alle avgangselevar frå grunnskolen skal få eit realistisk og levande bilete av utdanningsvegar og arbeids- og karrierevegar i Møre og Romsdal
- Karrieredagane skal gi dei unge ein sjanse til å finne ut meir om organisering og mangfald i regionalt næringsliv
- Arrangementa skal vere ein motivasjonsfaktor for å få ungdom til å velje utdanningsretning og yrke som finst i eigen region
- Arrangementa skal gi betre kjennskap og refleksjon i høve til utradisjonelle yrkes- og karrierevegar på tvers av kjønn og etnisk bakgrunn.
Transport
Det er gratis transport tur/retur frå skolane til dei ulike arrangementa. Tidsskjema blir sett opp og sendt den enkelte skole i god tid før Karrieredagane.
Organisering og gjennomføring av dagen
Organiseringa varierer frå region til region. Kvar regionale koordinator vil kome med nærare opplysningar når det nærmar seg arrangementet. Sett av ein skoledag.
Mat og drikke
Alle må ta med mat og drikke, då det ikkje i utgangspunktet er lagt opp til sal av mat. Det kan vere regionale skilnader, nærare informasjon vil kome til skolane i kvar region.
Klede
Nokre stader vil ein del av arrangementet vere lagt utandørs. Vi oppmodar alle til å kle seg etter vèr og temperatur slik at elevane kan vere ute utan å fryse.
Ansvar for elevane
Kvar skole har ansvaret for elevane sine gjennom arrangementet. Vi ber difor om dei som følgjer elevane er tett på og tek hand om dei som treng ekstra oppfølging. Ansvaret gjeld også det faglege utbyttet.
Vi sett krav om at lærarane førebur elevane godt til Karrieredagane og deltek saman med elevane for å fortsette prosessen med utdanningsval når dei kjem attende til skolane.
Elevar som ikkje er førebudd til Karrieredagane og ser arrangementet som ein del av rettleiinga mot val av vidaregåande opplæring vil ikkje få godt utbytte av det dei får vere med på.
Karrieredagane som del av faget utdanningsval
Vi oppmodar alle skolane til å implementere Karrieredagane i faget utdanningsval. Fylkeskommunen har, i samarbeid med Ungt Entreprenørskap Møre og Romsdal, utarbeidd eit arbeidshefte. Arbeidsheftet ligg på heimesida til fylkeskommunen.