Blir med på spleiselag med Hustadvika kommune
Eit spleiselag mellom Møre og Romsdal fylkeskommune og Hustadvika kommune gjer at ein kan starte bygging av ny rundkøyring ved Holamyra på fv. 64.
Fylkestinget vedtok einstemmig å dekke halvparten av totalkostnaden på 30 millionar kroner (eksklusiv mva.) for rundkøyringa, og godkjente samtidig at Hustadvika kommune forskotterer fylkeskommunen sin del av kostnaden på 15 millionar kroner.
I vedtaket er det føresett at eventuelle kostnadar ut over 30 millionar kroner må dekkast av Hustadvika kommune.
Under behandlinga i fylkestinget tysdag var det fleire representantar som ga ros til prosessen, og sa at kommunen og fylkeskommunen fortener skryt for å få til ei raskare gjennomføring av trafikksikkerheitsprosjektet.
Rundkøyringa er ferdig regulert. No står prosjektering og konkurranseutsetting for tur, som betyr byggestart tidlegast i 2024.
Holamyra næringsområde i Hustadvika er i vekst og utfordringane med trafikkavviklinga i dagens T-kryss, som koblar næringsområdet på fylkesvegen, har vakse over tid. Fylkesvegen har ein årsdøgntrafikk (ÅDT) på 7.900 og 10 prosent lange køyretøy, og i periodar er det vanskeleg å komme av og på vegen på trygt vis. Fartsgrensa langs fylkesvegen er 70 km/t, og det har vore fleire ulykker i krysset. Det er også meldt om mange nestenulykker.