Fylkestinget vedtok fleire tiltak etter aksjekjøp

Tiltaka skal følgjast opp både politisk og administrativt i tida som kjem. 

Det einstemmige vedtaket frå fylkestinget er slik:

Vedtaket

På bakgrunn av Deloitte sine vurderingar, konklusjonar og tilrådingar i rapporten ber fylkestinget fylkesordførar i samråd med fylkeskommunedirektør sørge for at det vert sett i verk tiltak for å:

1. Etablere ei eigarstyring av Fylkeshuset AS som er i samsvar med fylkeskommunen si eigarskapsmelding og tilrådingar frå KS om kommunal eigarskapsforvaltning, under dette:
   • Etablere eigarstrategi for Fylkeshuset AS, med mål, rammar og føringar for selskapet sitt arbeid.
   • Sikre at generalforsamlingar, eigarmøte mv. blir gjennomført i samsvar med dei føresegner og prinsipp som framgår av eigarskapsmeldinga, under dette når det gjeld kven som representerer MRFK som eigar.
   • Sikre at styret i Fylkeshuset AS blir organisert i samsvar med tilrådd praksis for kommunal eigarskapsforvaltning.
   • Etablere rutinar for gjennomføring av habilitetsvurderingar i tilknyting til førebuing og handsaming av saker som involverer både Fylkeshuset AS og MRFK.
2. Sikre at Fylkeshuset AS gjennomfører ei vurdering av om det rente- og avdragsfrie lånet Fylkeshuset AS har gitt til R8Me AS, er i samsvar med regelverk om offentleg støtte (statsstøtteregelverket).
3. Sikre at Fylkeshuset AS gjer dei tilpassingar som er naudsynte for å kunne ivareta krav i offentleglova om rett til innsyn.
4. Etablere rutinar for å sikre at fylkeskommunen sine etiske retningsliner knytt til å ha/ta anna lønna arbeid eller etablere næringsverksemd som kan gå utover arbeidet i fylkeskommunen blir etterlevd, og at innmelding, vurdering og avklaring av denne typen forhold blir dokumentert.
5. Fylkestinget ber fylkesordførar om snarast å kalle inn til ekstraordinær generalforsamling i Fylkeshuset AS for å sikre at relevante lovar og reglar blir fulgt. Fylkestinget ber fylkesordføraren forankre val av styreleiar og strategi og vedtekter i fylkesutvalet, og sikre at det blir innkalla til eigarmøte same dag som generalforsamlinga.
6. Fylkestinget ber også fylkesordførar i samråd med fylkeskommunedirektør utarbeide ein prioritert handlingsplan til kontrollutvalet innan 15.08.2023 som viser kva tiltak som skal setjast i verk for å følgja opp tilrådingane i rapporten, når tiltaka skal setjast i verk og kven som skal ha ansvaret for iverksettinga.
7. Fylkestinget ber fylkeskommunedirektøren lage ei oversikt over alle selskap/stiftingar med meir som Møre og Romsdal fylkeskommune har eigarskap i. Denne oversikta skal innehalde oversikt over generalforsamlingar, representantskapsmøte, årsmøte med meir, og vere ei sjekkliste gjennom kalenderåret for å føre kontroll med at fylkeskommunen som eigar blir kalla inn til møte i tråd med lovverket og selskapa/stiftingane sine vedtekter.
8. Fylkestinget viser til vedtak i sak T66/20 Eigarskapsmelding for 2019 og ber om a sak og utgreiing om eit eige eigarskapsutval blir lagt fram til junitinget 2023. 
9. Fylkestinget ber om at eigarskapsstyring blir ein eigen modul i politikaropplæringa for det nyvalde fylkestinget.
10. Protokollar frå generalforsamlingar i selskap der fylkeskommunen har eigarskap, skal vere tilgjengelege for fylkestinget og behandlast som referatsaker.