Jobbar vidare med Kjerringsund-sambandet

I saka «Kjerringsundsambandet - KS2, status og vegen vidare» skulle fylkestinget ta stilling til om Møre og Romsdal fylkeskommune saman med Aukra kommune skulle jobbe vidare med å optimalisere prosjektet gjennom å redusere usikkerheit og risiko. Dessutan at administrasjonen skal legge fram ei ny politisk sak om beslutningspunkt B3 etter prosedyre for sjølvfinansierande prosjekt. Dette når nødvendige avklaringar ligg føre.

Fylkestinget sa ja til dette med 30 mot 16 stemmer.

Målet med Kjerringsundsambandet er å gi fastlandssamband for øya Gossen i Aukra kommune. Prosjektet avløyser dagens fylkesvegferjesamband Aukra-Hollingsholm, og reisetida mellom Gossen og Molde blir redusert med om lag 20 minutt, og mellom Gossen og Ålesund med om lag 90 minutt. Prosjektet er avhengig av realisering av E39 Vik – Molde for å oppnå dette.

Prosjektet er ikkje prioritert av fylkeskommunen og det er derfor eit krav at prosjektet er sjølvfinansierande. Dette inneber at prosjektet ikkje skal påverke fylkeskommunal økonomi.