Planlegg etablering av Norsk Berekraftsenter AS

Berekraftsenteret har som mål å akselerere berekraftig utvikling i regionen.

Saman med United Cities, NHO, The North West, NTNU og AugmentCity har kommunane og fylkeskommunen jobba med utgangspunkt i ein intensjon om å samle initiativa i ei felles organisering.

Eigardel på inntil 10 prosent

Saka skal opp til behandling i fylkesutvalet 8. juni, før fylkestinget 20. juni skal vedta endeleg. Fylkeskommunedirektøren foreslår der at Møre og Romsdal fylkeskommune går inn på eigarsida i Norsk Berekraftsenter AS med ein eigardel på inntil 10 prosent, og til ein kostnad på inntil 2 millionar kroner. Han ber også om mandat til å framforhandle nødvendig avtaleverk i samarbeid med det tverrfaglege partnarskapet av interessentar.

Saka blir fremma parallelt i Møre og Romsdal fylkesting og i kommunestyra i Ålesund, Sula, Molde og Kristiansund.

Prosjekt og satsingar

Møre og Romsdal fylkeskommune har over dei siste to åra samarbeida tett med kommunane i Møre og Romsdal om berekraftig samfunnsutvikling. Fleire av kommunane har identifisert prosjekt og satsingar både saman og kvar for seg, for å sikre ønska utvikling. Det er på kort tid identifisert og sett i gong ei rekke prosjekt og satsingar på tvers av forvaltningsnivå, kommunar og sektorar.

«Samarbeidet spring ut av ei erkjenning av at dersom desse satsingane skal kunne vidareutviklast og styrkast, så bør dei konsoliderast», skriv fylkeskommunedirektøren i saksframlegget. Og: «No er det avgjerande at ein finn ein god samarbeidsstruktur for å sikre at ein får mest mogleg ut av dei pågåande satsingane og initiativa.»

Dette skal dei levere

I eit foreløpig utkast til forretningsplan, er det planlagd at senteret skal levere:

• Måling og evaluering: Dele og utvikle kunnskap om data, målingar og bruk av teknologi for å skape forståing og gjere det enklare å ta gode val for samfunnsutvikling.
• Simulering og strategisk planlegging: Simulere ulike framtidsbilde for at politikarar, industri og innbyggarar enklare kan forstå konsekvensane av vala dei gjer.
• Kompetanse og leiarutvikling: Læringsprogram basert på United Cities- program til leiarar; ordførarar, toppleiarar, administrerande direktørar, leiarar og samfunnsaktørar.
• Prosjektutvikling og finansiering: Rettleiing og opplæring i å iverksette og gjennomføre prosjekt med fleire partnarar i tillegg til bistand til ulike finansieringsløysingar.

Fylkeskommunedirektøren skriv at senteret skal ha ei økonomisk berekraftig drift og vere uavhengig av direkte driftsinntekter frå eigarane. Han skriv og at det i prosessen med å samordne berekraftsarbeidet i fylket, har vore dialog med støttespelarar i finanssektoren for å etablere eit berekraftsfond knytt til Norsk Berekraftsenter: «Eit slikt fond vil kunne bidra til å vere fødselshjelpar til konkrete berekraftsprosjekt med utspring i partnarskapsplattforma til Norsk Berekraftsenter», skriv fylkeskommunedirektøren.