Rekord: Over 100 millionar til anlegg for idrett og fysisk aktivitet i Møre og Romsdal

Møre og Romsdal fylkeskommune ved  kultur-, næring og folkehelseutvalet fordelte i dag 101 millionar kroner til anlegg for idrett og fysisk aktivitet i fylket. Dette er 13 millionar kroner meir enn i fjor, og midlane går til anlegg i alle kommunane i fylket.

Norsk Tipping hadde rekordhøgt overskot i fjor, og staten sette av ein større del av overskotet til idrettsanlegg i år. Dette gjer at meir midlar går til anlegg for idrett og fysisk aktivitet i kommunane i 2022.

Ventetida går ned

Det blir gitt tilskot til 104 søknader i år, av til saman 197 godkjente søknader. Det betyr at det framleis er ein del som ikkje får tilskot, men etterslepet og ventetida går ned.

- I fjor hadde vi ei ventetid på 3 år for å få spelemidlar i Møre og Romsdal, og året før var ventetida på nærmare 3,5 år. I år har ventetida gått ned til 2,5 år og denne utviklinga er vi fornøgde med, seier leiar i kultur-, næring- og folkehelseutvalet, Marit Nerås Krogsæter.

Ho peiker samtidig på at prisauken på materiell kan skape utfordringar for utviklinga av anlegg i fylket. Dette kan blant anna forklare kvifor talet søknader på nærmiljøanlegg har gått ned frå 95 til 73.

- Den prisauken vi har sett på mellom anna treverk og stål i det siste gjer at anlegga blir dyrare no. For mange anlegg vil derfor spelemidlane utgjere ein mindre del av finansieringa enn den gjorde tidlegare. Dette kan nok vere ein av grunnane til at færre søkar midlar til nærmiljøanlegg i år, seier Krogsæter.

Tildeling ordinære anlegg

Tildeling nærmiljøanlegg