Tre nye rektorar på vidaregåande skolar

• Roger A. Fylling (56) startar 1. august som rektor ved Borgund vidaregåande skole.
• Øystein Bråthen (40) blir frå 1. juni konstituert som rektor ved Sunndal videregående skole.
• Tove Lersveen (57) blir konstituert som rektor ved Stranda vvidaregåande skole frå 1. august.

Fylling blir ny rektor ved Borgund vidaregåande skule

Roger A. Fylling (56) er tilsett og har takka ja til stilling som rektor ved Borgund vidaregåande skole.

Han startar i jobben i august.

- Å verte rektor ved Borgund vidaregåande skole er ei oppgåve eg er både stolt og audmjuk over, seier Fylling. - Skulen har særs lange og stolte tradisjonar som yrkesfagskule å ivareta. Frå 21 år i fylkeskommunen, og av dei 12 år som rektor for ein yrkesfagleg skole, opplever eg å ha fått god innsikt i, og stor respekt for den fantastiske jobben dei tilsette og elevane gjer ved Borgund vidaregåande skule.

- Eg ønsker å verte kjent med skulen og bidra til, saman med dei tilsette, å styrke og utvikle både læringsmiljø og merkevarebygginga til eit sentrum i utdanninga av dei unge i regionen Nordre Sunnmøre. At skolen skal fortsette å vere ein naturleg samtalepartnar opp mot eit spennande næringsliv i regionen, er ei av fleire sentrale oppgåver eg ser fram imot å bidra til. Dette vert både utfordrande og spennande, seier Roger A. Fylling.

Fylling kjem frå ei yrkesfagleg utdanning. Med seg har han Mastergraden EMBA, Executive Master of Business Administration, med fordjuping i strategisk leiing. Han har pedagogisk utdanning og omfattande vidareutdanning innan leiing og juridiske og økonomiske fag. Roger A. Fylling arbeidde nokre år i internasjonale hotellkjeder, før han gjekk over i driftssjefstilling knytt til foodservice mangangement for Sveriges Regjeringskansli Rosenbad og fleire andre driftseiningar i Stockholms-området.

Frå 2002 har han vore tilsett i Møre og Romsdal fylkeskommune, både i undervisningsstillingar på Rauma videregående skole og Ørsta vidaregåande skule, på kompetanse og næringsavdelinga og dei siste 12 åra som rektor ved Ørsta vidaregåande skule.

Konstituerer rektor, prøver ny modell for samarbeid

Tingvoll-rektor Øystein Bråthen (40) blir rektor ved to skolar når han frå 1. juni blir konstituert som rektor ved Sunndal videregående skole.

- Vi ønsker å utvikle skolane vidare for elevane, og eitt av stega er å etablere eit enda tettare samarbeid mellom skolane på indre Nordmøre. Dette er ei god anledning til å prøve ut ein modell med ein felles rektor for to skolar, seier kompetanse- og næringsdirektør Erik Brekken.

Han seier dei må ha eit visst tidsspenn på ei slik ordning for å sjå om det kan vere potensielle synergiar i samhandlinga i framtida, før ein evaluerer og landar på ei endeleg løysing.

Bråthen blir konstituert frå 1. juni og ut neste skoleår. Egil Ruud er i dag rektor på Sunndal vgs., men blir pensjonist frå sommaren -23.

- Bråthen har takka ja til å ta over stafettpinnen i ein periode. Han har stor kapasitet og har gjort ein svært god jobb som rektor ved Tingvoll vgs., seier Brekken.

Bråthen har vore rektor ved Tingvoll vgs sidan 2018. Han har utdanning i idrettsfag og pedagogikk frå NIH, der han også har ein master i coaching og psykologi. I tillegg til leiarutdanning frå BI. Han har hatt ulike leiarstillingar i Oslo-skolen, og kom frå stilling som assisterande rektor ved Persbråten vgs i Oslo då han vart tilsett i Møre og Romsdal fylkeskommune.

- Vi ønsker å utvikle skolane vidare for elevane, og eit av stega er å etablere eit enda tettare samarbeid mellom skolane på indre Nordmøre. Dette er ei god anledning til å prøve ut ein modell med ein felles rektor for to skolar. Vi må ha eit visst tidsspenn på ei slik ordning for å sjå om vi kan ha potensielle synergiar i samhandlinga i framtida, og vi må ha gode evalueringsprosessar før vi landar på ei endeleg løysing.

Lersveen konstituert som rektor ved Stranda vgs.

Tove Lersveen (57) blir konstituert som rektor ved Stranda vidaregåande skule frå 1. august.

Noverande rektor Jon Hjortdal har fått jobb som avdelingsleiar ved Sykkylven vidaregåande skule.

- Eg ser fram til å tiltre som rektor ved Stranda vgs., og takkar for tilliten arbeidsgivar viser ved å konstituere meg i stillinga, seier Lersveen.

Tove Lersveen har lærarutdanning med pedagogikk, idrettsfag og friluftsliv frå NIH og en master i skoleleiing frå NTNU.  Ho har vore tilsett ved Stranda vgs. sidan 1992 som idrettsfaglærar, og dei tre siste åra som leiar.