(A) Retningslinjer for bruk av regionale utviklingsmidlar

Detaljerte formål og vilkår er definert for den enkelte støtteordning, men for alle ordningane gjeld følgande prinsipp: 

• Tilskot skal nyttast til tidsavgrensa utviklingsprosjekt, ikkje til drift og vedlikehald av ein organisasjon, eit tilbod eller av infrastruktur. Tilskotet frå fylkeskommunen skal vere avgjerande for at prosjektet blir gjennomført.

• Det vert ikkje gitt støtte til allereie gjennomført aktivitet
• Fylkeskommunedirektøren har mynde til å behandle søknader om inntil 500 000 kroner i tilskot. Større søknader enn dette, og saker av prinsipiell betydning vert behandla av Kultur-, næring- og kompetanseutvalet.
• Alle støtteordningar skal kunngjerast på mrfylke.no og søknader skal leverast i søkeportalen www.regionalforvaltning.no
• Alle prosjekt må innehalde eigeninnsats frå søkar. Normalt er tilskot frå fylkeskommunen avgrensa til maksimalt 50 prosent av totalkostnad, og timepris for søkjar sin eigeninnsats følgjer Innovasjon Norge sine satsar. Dette kan avvikast, anten som eit særvilkår i ei støtteordning, eller etter særleg grunngjeving i enkeltsaker. 
• Alle ordningar og søknader vert vurdert opp mot statstøtteregelverket som følgjer av EØS-avtalen.
• Alle søknader og all saksbehandling blir arkivert og er offentleg.  

Ved vurdering av søknaden vert det lagt vekt på:

• I kva grad prosjektet bidrar til å nå måla og fyller vilkåra for den utlyste ordninga
• Søkar si gjennomføringsevne, kompetanse og metodikk
• Realisme i prosjektplan og kostnadsoverslag
• At prosjektet heng saman med eller støttar opp under andre utviklingsprosessar
• At prosjektet bidrar til å skape varig endring