YENESIS - Klima, energi og entreprenørskap
Fylkeskommunen deltek i EØS-prosjektet «Youth Employment Network for Energy Sustainability in Islands» som skal førebygge og redusere arbeidsløyse blant unge, gjennom fokus på mellom anna entreprenørskap og grøne arbeidsplassar.
Det skal utviklast eit økosystem for å sikre at fleire unge med kompetanse på øysamfunn i Europa skal ha betre grøne jobbmoglegheiter. Alle partnarar skal utvikle kompetansen på berekraftig gründerverksemd og jobbskaping innan fornybar energi, mobilitet, energieffektivisering og berekraftig reiseliv.
Youth Employment Network for Energy Sustainability in Islands (YENESIS) skal forebygge og redusere arbeidsløyse blant unge frå øysamfunn gjennom utvikling av kompetanse og ferdigheiter, entreprenørskap og grøne arbeidsplassar.
I 2023 har vi utvikla opplæringsprogrammet med nye modular innan fagfelta berekraftige matsystem, klimatilpassing, vassforvaltning og sirkulærøkonomi. Det er her utvikla eigne kurs retta mot elevar/studentar, lærarar, karrierevegleiarar og arbeidsgivarar.
Møre og Romsdal fylkeskommune si hovudleveranse i den siste perioden har vore å utvikle og gjennomføre ei kursrekkje innan soft-skills. Soft skills omhandlar mellommenneskeleg samhandling, problemløysing, tilpassingsdyktigheit, samarbeid, leiarskap og kommunikasjon.
Våre karrierevegleiarar utvikla kurs og gjennomførte i løpet av våren opplæring innan soft-skills med unge utan arbeid, opplæring og utdanning ute i alle deltakarregionane. I etterkant er kursa vidareutvikla for å treffe våre eigne ungdommar. I 2024 skal det køyrast ei kursrekkje i heile fylket, retta mot ungdom i alderen 16-24 år som har falt utanfor utdanning og arbeid.
Prosjektet er eit samarbeid mellom 10 partnarar frå 8 europeiske land. Møre og Romsdal fylkeskommune er med som ekspertpartnar. Prosjektet hadde opphaveleg 2018 - 2023 som prosjektperiode, men har blitt forlenga til 2024.
Les meir om prosjektet på yenesisplatform.eu
School21 – Uteundervising for utvikling av framtidskompetanse
School21 er eit EØS-prosjekt med mål om å utstyre unge menneske med ferdigheiter og kunnskapar for det 21. århundre.
Dette skal skje gjennom utviklinga av nye undervisingsmetodar og verktøy, og uteundervising er ein av desse metodane. Prosjektet består av fire slovenske partnarar og Møre og Romsdal fylkeskommune som ekspertpartnar. Fylkeskommunen bidreg til prosjektet i tett samarbeid med Friluftsrådet Nordmøre og Romsdal.
Vi har mellom anna utarbeidd ein rapport om uteundervising i regionen og hadde dei slovenske partnarane på studiebesøk i oktober 2022. I april 2023 skal vi til Slovenia for å gi eit utval slovenske lærarar opplæring i nokre uteundervisingsmetodar. Vidare skal lærarane sjølve skal lære opp fleire lærarar på eigne skolar.
Prosjektperioden er frå 2022 til 2024 og med eit totalbudsjett på 581 000 euro. Vårt budsjett er på 97 329 euro. Prosjektet er fullfinansiert gjennom EØS-midlane (Norway grants).
Les meir på prosjektsida til School21
EØS-prosjekt med den polske kommunen Zawiercie
Møre og Romsdal fylkeskommune inngjekk i 2022 eit prosjektsamarbeid med den polske kommune, Zawiercie. Prosjektet omhandlar yrkesutdanning, ungt entreprenørskap og samarbeid mellom skole, lokalsamfunn og næringsliv, finansiert gjennom EØS-midlane.
Zawiercie ligg sør i Polen og har omtrent 50.000 innbyggarar. Industri- og jordbrukskommunen opplev nedgang i folketalet og har utfordringar med å halde på ungdom og tilby dei relevant arbeid. Gjennom prosjektet ønsker dei å sjå nærare på korleis vi driv fag- og yrkesopplæring i Møre og Romsdal og korleis ein samarbeider lokalt for å skape arbeidsplassar og attraktive lokalsamfunn.
Prosjektet går over to år og har eit budsjett på 150 000 euro. Blant aktivitetane er fleire gjensidige besøk i både Norge og Polen, i tillegg til kurs i undervisning av entreprenørskap i skolen. Stranda vgs., Sykkylven vgs. og Sunndal vgs. er med prosjektet og har vore sentrale aktivitetane. Desse skolane har sterke tradisjonar innan fag- og yrkesopplæring og har alle nært samarbeid med lokalt næringsliv.
OSS - One Stop Shop - internasjonalt samarbeid om betre gründerhjelp
Møre og Romsdal fylkeskommune var prosjektleiar for prosjektet One Stop Shop (OSS), målet for prosjektet var å gjere det lettare å starte bedrift i Europa.
Prosjektet fekk innvilga 1 477 612 euro frå Interreg Europe-programmet. Prosjektet starta opp våren 2018 og blei avslutta i 2023. Dei andre partnar-organisasjonane kom frå England, Bulgaria, Spania, Slovenia, Polen og Belgia.
Prosjektet hadde som mål å forbetre både den fysiske og digitale gründerhjelpa i heile Møre og Romsdal gjennom gründertenesta hoppid.no, samt å betre politikksystem for små- og mellomstore bedrifter for å auke konkurransekraft i fylket.
Med oss inn i prosjektet hadde vi spesifikke utfordringar vi ville løyse:
- Auke tal på oppstartsbedrifter i regionen
- Auke tal på tilsette i oppstartsbedrifter i regionen
- Forbetre oppstartssystemet for oppstartsbedrifter med særleg fokus på utfordringar vi har relatert til logistikk og rurale område
hoppid har gjennom OSS-prosjektet blitt ein meir digital, tilpassa teneste for oppstartsbedriftene i regionen. Dei har vidareutvikla støttesystemet til å inkludere nettverk, mentorar, rollemodellar og auka fokus på likemannsnettverk. Dette er gjort mogeleg gjennom ei betre digital plattform. Eit utvida nettverk er ein viktig faktor for oppstartssuksess. Det nye digitale hoppid-systemet har også eit auka fokus på sjølvhjelp med ressursar som er tilgjengeleg for gründerane å bruke på eigenhand. Dette er særleg aktuelt for gründerar i tidlegfase. Eit viktig prinsipp frå OSS-prosjektet har vært at det skal vere ei dør inn for gründerane, slik at dei skal få tilgang til både rådgivarar, entreprenørskapssystemet, nettverk og andre gründerar med lik kvalitet og uavhengig av kor dei bor.
Alle kommunar i Møre og Romsdal har fått nytte av OSS prosjektet. Kommunane har delt kunnskap om korleis vi forbetrar eksisterande program og verkemiddel i kontakt med næringsaktørar, lokalsamfunn, og politikk. Tema for læring har vore digitale løysingar, betre etablerarhjelp i kommunen, mentorordningar, tilgang kapital, betre samhandling mellom ulike forvaltningsnivå, og utvikling av attraktive cowork-miljø for oppstartsbedrifter.
I tillegg til prosjektresultata har OSS fungert som ein katalysator for «Cowork på bygda». Det har ført til oppstart av 9 cowork-lokasjonar i rurale område i fylket, samt oppstart av ei utlysningsordning for dei som ønsker å starte og drive cowork i regionen. Desse møteplassane er viktige både for oppstartsbedrifter, for tiltrekking av kompetanse og for lokalsamfunna. OSS har også forbetra oppstartsreisa for immigrantar, noko vi no byggar videre på i prosjektet BSI_4Women. Kontaktperson: May-Britt Roald
G-Green Passenger Transport in Rural Areas
Møre og Romsdal fylkeskommune er partnar i prosjektet G-PaTRA som handlar om å finne løysingar for å redusere CO2-utslepp frå persontransport også ute i distriktet. Deltakarane står for mange forskjellege initiativ for å nå målsettingane - alt frå å kjøpe inn el- eller hydrogenbussar til å utvikle ein reise-app.
Noreg har bidratt med å utforme ein businesscase som kan bli overført til andre øysamfunn, der vi såg på moglegheitene for å produsere hydrogen med til lokal bruk (hurtigbåt, buss, ambulansebåt osv) med energi frå vindkraft. Bakgrunnen for arbeidet er at finst få grøne løysingar for transport utanfor bykjernene. Deltakarane er bedrifter og offentlege aktørar knytt til transport frå Nederland, Storbritannia, Belgia, Tyskland og Danmark.
Både fylkeskommunen, Nasjonalt vindenergisenter på Smøla og Smøla Nærings- og kultursenter med på prosjektet frå Noreg. Prosjektet er støtta av Interreg Nordsjøprogrammet. Den opphavelege prosjektperioden var frå hausten 2017 til 2021, men vi er også med som følgepartnar i ein tilleggsperiode med slutt 2023 der dei andre partnarane utforskar koronapandemiens innverknad på transport- og mobilitet i rurale område.
Les meir om prosjektet på nettsidene til INterreg North Sea Region.