Utveksling i Europa for lærlingar

Opplæringskontor og frittståande lærebedrifter kan søke om å delta i “Læretid i Europa”, og lærlingane deira lærlingar kan reise på utveksling.

Det er opplæringskontoret eller lærebedrifta som vel ut kven av lærlingane som kan reise på utveksling. Lærlingane må vere over 18 år, ha godkjent lærekontrakt eller opplæringskontrakt i Møre og Romsdal.

Lærekandidatar og kandidatar med tilretteleggingsbehov kan også reise på utveksling. Opplæringskontoret kan søke ekstra midlar ved behov.

Lærlingar kan reise til EU eller EØS-land som fylkeskommunen, opplæringskontor og lærebedrifter har samarbeidspartnarar i. Lærlingen bur på internat, i leilegheit saman med andre lærlingar eller hos vertsfamilie.

Lærlingane blir følgde tett opp på arbeidsplassen i utlandet.

Opphaldet kan vare frå 2 veker til 6 månadar, men vi anbefaler 1-4 månadar.

Tilsette på opplæringskontor eller i lærebedrifter kan også reise til mottakarland for å førebu og kvalitetssikre framtidige utvekslingar. Slike besøk er ofte nødvendige for å knytte kontakt og avklare praktiske spørsmål rundt bustad, transport og jobbsituasjonen i utlandet.

Opphaldet blir finansiert gjennom Erasmus+, som er EU sitt utdanningsprogram. Midlane dekker reise, levekostnadar, forsikring, administrasjon og språkkurs. Fylkeskommunen søker midlar på vegner av opplæringskontora som er med i “Læretid i Europa”. Midlane blir betalt ut til opplæringskontoret, ikkje direkte til lærlingen. 

Lærlingane får ikkje løn under opphaldet, men vil få eit stipend som kompenserer for dette. Dersom lærlingen allereie har bortebuarstipend frå Statens lånekasse, vil han behalde dette. 

Ungdommar frå Sunnmøre kan i tillegg søke om stipend frå Michael Width Endresens fond for handel og handverk. 

Tilsette på opplæringskontor, faglege leiarar og instruktørar i lærebedrifter kan auke kompetansen sin gjennom “Læretid i Europa”. Internasjonale prosjekt kan gi oppdatert fagkompetanse og inspirasjon til å utvikle nye og innovative arbeidsmetodar.

Dei kan reise til yrkesfaglege skolar, opplæringskontor eller læreplassar i andre land i Europa for å delta på: 

• Jobbskygging
• Hospitering
• Førebuande besøk
• Faglege kurs
• Følge elevar eller lærlingar
• Yrkesfaglege konkurransar