Bruk navigasjonen for å raskt finne fram til det du treng svar på.
Planlegging for friluftsliv
Etter forvaltningsreforma i 2010 har fylkeskommunen ei oppgåve som talsmann og vaktmann for allemannsretten. Dette gjer vi mellom anna ved å informere om og ivareta allmenta sine interesser gjennom handsaming av saker etter plan- og bygningslova.
Vi samarbeider med kommunane om å utvikle friluftslivet i fylket. For at flest mogleg skal ha glede og nytte av friluftslivet, treng vi ulike typar friluftslivsareal, som er tilrettelagt i ulik grad. Då er det viktig med god arealplanlegging etter plan- og bygningslova.
Arbeider du med friluftsliv? Hos oss kan du få råd og rettleiing eller innspel til kommunale planar om friluftsliv.
Les meir om korleis vi gir rettleiing til kommunale planar
Satsingsområde
Morotur
I samarbeid med kommunane og frivillige turentusiastar har vi etablert nettsida morotur.no.
Nettsida presenterer eit variert utval av ski, sykkel-, padle- og fotturar, og gir tips om fine turar i heile fylket vårt. Morotur leverer også turskildringar til turkassetrimmen StikkUT!
Eg vil dra på Morotur!
Friluftslivets ferdselsårer
Å kunne utøve friluftsliv er viktig for våre innbyggarar. God tilgang til turstiar og ferdselsårar der folk bor er viktig for trivsel, helse og grøn transport. Det er derfor også viktig for å utvikle berekraftige kommunar.
Det er eit nasjonalt mål i friluftslivspolitikken at kommunane skal utarbeide planar for friluftslivets ferdselsårar. Slik kan arbeidet med tilrettelegging for auka friluftslivsaktivitet gjerast målretta og systematisk.
Plan for friluftslivets ferdselsårer er eit fleirårig prosjekt som er satt i gang av Klima- og miljødepartementet (KLD). Prosjektet starta i 2019 og vil avsluttast etter 2025. I prosjektet samarbeider Miljødirektoratet, kommunar, friluftsråda og Møre og Romsdal fylkeskommune om å utarbeide planar for friluftslivets ferdselsårar i kommunane. Slik kan vi få frem målretta opparbeiding, skilting og merking av samanhengande nettverk av turstiar i kommunane. I prosjektet blir det mellom anna lagt til rette for erfaringsdeling, kompetanseheving og bistand med GIS-arbeid.
Kommunar kan også søke om økonomisk støtte til arbeidet. Følg denne lenka for å komme til søknadsskjema for ordninga friluftslivets ferdselsårer.
Du kan les meir om arbeidet med å ivareta og utvikle ferdselsårer for friluftsliv på Miljødirektoratet sine nettsider.
Skjærgårdstenesta
Skjergardstenesta skal legge til rette for friluftsliv ved sjøen gjennom drift, skjøtsel og forvaltning av offentleg eigde friluftslivsområde i og ved sjø. Marin forsøpling, haldningsskapande arbeid, og mobilisering av og hjelp til frivillige, er også ein del av arbeidsoppgåvene.
Skjergardstenesta gjeld i medlemskommunane til dei to friluftsråda i fylket.
Den blir finansiert av Miljødirektoratet, Sunnmøre Friluftsråd, Friluftsrådet for Nordmøre og Romsdal og Møre og Romsdal fylkeskommune.
Helseløyper
Vi ønsker å stimulere til at kommunar og frivillige organisasjonar legg til rette for meir fysisk aktivitet gjennom friluftsliv. Som eit ledd i dette prioriterer vi friluftslivsanlegg og helse høgt i behandlinga av spelemidlar.
Helseløyper er friluftslivsanlegg som legg til rette for at folk flest kan drive med fysisk aktivitet og friluftsliv. Dette er turløyper i grøntareal som ligg i nærleiken av bustadområde. Hovudtraséen skal ha eit fast og jamt underlag der stigningane ikkje er brattare en 1:12 (helst 1:20). Lys og ledeliner samt god skilting vil gjere at brukarane vil føle seg trygge. Erfaring viser at god tilrettelegging for flest mogleg, gir auka bruk både for funksjonsfriske og folk med funksjonsnedsettingar.
I tillegg til at friluftslivsanlegg og spesielt helseløyper vert prioritert i sjølve fordelinga, legg også føresegnene til rette for at 50 % av kostnadane med slike anlegg kan finansierast av spelemidlar. Dugnad, kommunale midlar, gåver frå næringslivet og liknande kan brukast for å fullfinansiere prosjektet.
Du finn krava til kva som må og bør vere med i ei helseløype lista opp under. Ein må ikkje fylle alle krava til ei helseløype første gong ein søker midlar til eit slikt anlegg. Men om ein viser til ein plan og ei retning for korleis ein har tenkt å utvikle anlegget i tråd med krava, vil det vere ei styrke for søknaden.
Ei helseløype må
- ha gode høve for parkering og minimum ein HC-plass
- skilting i tråd med nasjonal mal
- minimumsbreidde på 150 m med godt underlag for barnevogn/rullestol
- liten stigningsgrad maks 1:12
- nummererte benkar (bør ikkje vere meir enn 100 m mellom kvar benk)
- vere i estetisk gode omgivnader
- ledeliner i form av kontrast mellom veg og omgjevnader
- tilgjengeleg toalett (HC)
- vere registrert på morotur.no
- ha lys
- vere brøyta og strødd om vinteren
Ei helseløype bør
- vere rundløype (0,5–2 km)
- ha kollektivsamband
- vere i nærleiken av bustadområde
- stigning mindre enn 1:20
- ha fleire turalternativ på ulike nivå
- ha element som gjer turopplevingane rikare
Statleg sikring av friluftslivsområde
Kommunar og interkommunale friluftsråd kan søke Miljødirektoratet om økonomisk støtte til å sikre seg råderett over friluftslivsområde eller ferdselsårer gjennom kjøp eller bruksavtale. På denne måten kan prioriterte friluftsområde få eit særleg og langsiktig vern og samtidig få tilgang på tilskotsmidlar til opparbeiding av området.
Send søknaden til fylkeskommunen gjennom elektronisk søknadssenter. Møre og Romsdal fylkeskommune vidaresendar ei anbefaling til Miljødirektoratet om kven som bør få økonomisk støtte.
Miljødirektoratet sine prioriterte område
- Område som kjem store folkegrupper til gode, nærområde og turvegar/stiar i byar og tettstader har høgast prioritet
- Landfaste område ved sjøen
- Område som vil bli intensivt brukt og som treng tilrettelegging for å kunne brukast til friluftslivsformål
- Område som er behandla og prioriterte i kommunal planprosess etter plan- og bygningslova (t.d. kommuneplan, kommunedelplan for fysisk aktivitet eller reguleringsplan)
Les meir om korleis du kan søke om støtte til statleg sikring