Angst for tannbehandling - TOO

Personar frå og med 20 år som enten

• har vore utsett for tortur
• har vore utsett for overgrep eller vald i nære relasjonar
• har sterk angst for tannbehandling, odontofobi
• har sterk angst for blod, skade og injeksjonar (blod-/skade-/injeksjonsfobi).

Du må ha vesentlege vanskar med å motta tannbehandling og være motivert for å arbeide med desse vanskane gjennom treningstimar med psykolog og tannhelsepersonell.

Samtale og eksponeringsterapi

Du vil få hjelp av eit tverrfagleg behandlarteam TOO som består av psykolog, tannlege og tannhelsesekretær. Behandlingstilbodet er kognitiv åtferdsterapi retta mot tannbehandlingsangst på inntil 10 timar.

Det er viktig at ein kan møte til oppsette treningstimar hos TOO-teamet dersom ein får tilbod om behandlingsoppfølging. To uteblitte timar vil i utgangspunktet medføre avslutning av behandlingsoppfølginga.

Behovet ditt blir kartlagt i ein samtale med psykolog, slik at vi kan lage eit behandlingsopplegg som er tilpassa deg.

Den vidare oppfølginga bygger på prinsipp frå eksponeringsterapi, som har god effekt på behandling av fobiar. Sjølve angstbehandlinga består av å øve gradvis på dei situasjonane som du synest er mest vanskeleg. Du får moglegheit til å lære deg strategiar til å meistre situasjonar som er vanskelege.

Det tverrfaglege TOO teamet i Møre og Romsdal fylkeskommune er lokalisert på Molde kompetanseklinikk.

Tilpassa tannbehandling

Når du er ferdig hos Tverrfagleg behandlarteam TOO, blir du overført til Tannbehandlarteam TOO. Dei skreddarsyr og gjennomfører tannbehandling etter ditt behov. Teamet har fått nødvendig informasjon, slik at tannbehandlinga blir tilpassa ditt meistringsnivå.

Etter at du er ferdig med behandlinga, er du sjølv ansvarleg for å følge opp tannhelsa hos tannlege eller tannpleiar.

På nettsida tooinfo.no kan du finne informasjon og videoar om behandlinga som blir tilbydt. 

Det må påreknast lang ventetid på vurderingssamtale. Per dags dato er det inntil 2 års ventetid.

TOO-behandlinga er gratis. Treng du vidare tannbehandling hos ein annan tannlege eller tannpleiar, må du betale.

Du kan enten sjølv ta kontakt eller be din lege, psykolog eller tannlege om å tilvise deg. 

Send tilvising til:

TOO-teamet
ved Molde kompetanseklinikk
Postboks 2512
6404 Molde

Telefon 71 28 46 20
E-post: TOO-team@mrfylke.no 

(E-post er ikkje eit beskytta kommunikasjonsverktøy og må derfor ikkje innehalde personsensitive opplysningar. Av den grunn skal tilvisingar ikkje sendast per e-post)

Tilvising til TOO teamet skal inneholde følgande informasjon:

• pasientens fødselsnummer og kontaktinformasjon.
• eventuelle rettigheitar i fylkeskommunal tannhelseteneste.
• kva for kriterium som ligger til grunn for henvisninga.
• kort informasjon om eventuelle vanskar i tannbehandlingssituasjonen.
• kort beskriving av den orale helsa og eventuelle smerter eller infeksjonar i munnen.
• fysisk helse og eventuelt medikamentbruk.
• stadfesting på at pasienten er kjent med behandlingsforløpet, kan forplikte seg til det og vurderast som motivert for å delta.
• henvisende behandlar sin kontaktinformasjon. 

I Møre og Romsdal er det oppretta eit kvalitetsregister for å kunne systematisk evaluere behandlinga som TOO pasientene i fylket får. I tilknyting til kvalitetsregisteret er det også oppretta eit forskingsprosjekt som er godkjent av Regional Etisk Komite (Midt Norge, 2022/488462).

Det er heilt frivillig å delta i kvalitetssikringsprosjektet, og all informasjon som blir innhenta blir avidentifisert og oppbevart trygt, slik at personvernet ditt er sikra. Meir informasjon om registeret vil du få både skriftleg og munnleg ved kontakt med TOO teamet.