Brøyting, salting og strøing

Vegane er delt inn i driftsklasser som bestemmer kva standard vegen skal ha. Trafikkmengda, funksjonen vegen har i samfunnet og klima avgjer når og kor ofte vegen blir brøyta og strødd.

På fylkesvegane som har mest trafikk skal det ikkje gå meir enn to timar mellom kvar gong brøytebilen køyrer under snøfall. På dei minst trafikkerte fylkesvegane er kravet 3 timar.

Brøytemannskapa baserer arbeidet sitt på vêrprognoser. Når desse slår feil eller det blir ei plutselig endring i vêrforholda kan det ta lengre tid før brøytinga startar. Vinterberedskapen er dimensjonert etter normale vinterforhald. Ved svært store eller vedvarande snøfall kan det bli krevjande køyreforhald sjølv om entreprenørane har alt mannskap på vegane.

Salt eller sand?

Møre og Romsdal fylkeskommune brukar både salt og sand for å hindre at vegen blir for glatt.

Salt fungerer på fleire måtar mot glatte vegar:

• Senkar frysepunktet på vatn slik at det ikkje frys på vegen.
• Hindrar snøen i å klumpe seg saman og feste seg til asfalten.
• Kan smelte ishinne på vegen.

Sand kan vere eit alternativ til salt for å gjere vegen mindre glatt. Ulempa med sand er at den berre  ligg på vegen i kort tid. Etter hundre bilar ligg mesteparten av sanda i grøfta og vegen er like glatt.  

For å få sanda til å ligge lenger kan vi tilsette varmt vatn slik at ho frys fast til vegen. Dette tiltaket krev stabile vinterforhold med minusgrader, og at det er så lite trafikk at sanda får tid til å fryse fast utan at bilar bles ho av vegen.

Drift og vedlikehald er viktig for trafikktryggleiken og framkomsten heile året. I drift og vedlikehaldskontraktane Møre og Romsdal fylkeskommune har med ulike entreprenørar inngår det ei rekkje oppgåver ut over vinterdrift:

• Reparasjonar på vegen
• Reparasjonar av skader andre har påført vegen og vegutstyret
• Reparasjonar og vedlikehald på ferjekaier.
• Reinsking av grøfter og stikkrenner (dreneringsrøyr)
• Visuell kontroll  og reparasjonar av bruer, tunnelar, murar og rekkverk
• Reinhald av tunnelar
• Reinhald og oppretting av skilt
• Drift av rasteplassar
• Søppeltømming
• Kantklipp
• Vedlikehald av parkareal og plenar