Fylkeskommunen fekk i år inn ti søknadar, med ein samla søknadssum på 2.074.500 kroner. Herøy kommune, som fekk støtte til etablering av frisklivssentral i fjor, er den einaste kommunen som søker midlar til etablering av ny frisklivssentral. Dei andre søknadane kjem frå sju kommunar med etablerte frisklivssentralar. I tillegg søker Vestnes kommune om støtte til etablering av meistringstilbod.
– Frisklivssentralane spelar ei avgjerande rolle i å førebygge sjukdom og fremme livskvalitet. Vi er stolte av å kunne bidra til deira vidare arbeid, seier Jessica Gärtner, leiar i kultur- og folkehelseutvalet i fylkeskommunen.
Frisklivssentralane si rolle
Frisklivssentralane er ei kommunal helseteneste som har som mål å fremme fysisk og psykisk helse. I tillegg skal dei førebygge eller avgrense utvikling av sjukdom ved å gi tidleg hjelp. Sentralane skal bidra til heilskaplege, koordinerte helsetenester og utjamne sosiale skilnader i levevanar og helse. Dei skal ha oversikt over, og kjennskap til, relevante offentlege, frivillige og private tilbod og tenester i kommunane og spesialisthelsetenesta. Dei skal samarbeide med desse for å leie brukarane vidare når det er aktuelt.
Utviklingssentral i Kristiansund
Møre og Romsdal har i dag 14 frisklivssentralar, der sentralen i Kristiansund fungerer som utviklingssentral for dei andre sentralane i fylket. Utviklingssentralen tilbyr mellom anna hospitering til nyetablerte frisklivssentralar og rettleiar ved behov. Dei har også eit større ansvar for organisering, planlegging og gjennomføring av regionale nettverksamlingar.
Viktig vedtak for folkehelsa
Vedtaket om tildelinga vart einstemmig vedtatt av kultur- og folkehelseutvalet. Dette viser kor viktig desse midlane er for å fremme helse og livskvalitet i fylket vårt. Frisklivssentralane spelar ei sentral rolle i det lokale folkehelsearbeidet, og med årets tildeling kan dei fortsette sitt viktige arbeid med å støtte og hjelpe innbyggjarane i Møre og Romsdal.
– Vi ser fram til å sjå dei positive resultata av denne tildelinga. Frisklivssentralane er viktige aktørar i det lokale folkehelsearbeidet, avsluttar Gärtner.
Her kan du sjå årets tildeling:
| Kommune | Tildeling i kroner |
|---|
| Aure | 40.000 |
| Herøy | 280.000 |
| Hustadvika | 192.000 |
| Kristiansund | 105.000 |
| Molde | 100.000 |
| Rauma | 192.000 |
| Smøla | 61.000 |
| Vanylven | 180.000 |
| Vestnes | 50.000 |
| Samla tildeling | 1.200.000 |
Saksliste, saksframlegg og møteprotokoll for kultur- og folkehelseutvalet 11. mars