Anniken Haukeberg er årets lærling, og seier at læretida i kristiansundsbedrifta SR Group er den mest lærerike perioden ho har att.
Jon Ødegård/SR Group
Anniken Haukeberg syns det både er stas og ei stor ære å få prisen:
-Eg er veldig takksam for at eg har hatt ei så fin bedrift som SR Group, og gode støttespelarar rundt meg som har gjort lærlingtida til den finaste og mest lærerike perioden i livet mitt, seier ho om tildelinga.
Etter yrkesopplæring på Fagerlia – Ålesund vgs, var Anniken lærling i yrkessjåførfaget hos SR Group i Kristiansund. Både lærebedrift og prøvenemnda nominerte Anniken til årets lærling, og i konkurranse med mange andre dyktige lærlingar, var det ho som stakk med den gjeve prisen.
Som Årets lærling vil ho få ein pengepremie på 10 000 kroner, diplom og blomster.
Med denne prisen ønsker Møre og Romsdal å synleggjere og heidre alle dei dyktige lærlingane i fylket.
Profesjonell og engasjert
I følge lærebedrifta har Anniken vore uredd, nysgjerrig og open for nye utfordringar. Ho har vist stor evne til å opptre profesjonelt, og har alltid vore imøtekommande og engasjert i jobben. Bedrifta har set stor pris på den positive merksemda ho har fått, både på arbeidsplassen og frå kundar og samarbeidspartnarar. Gjennom lærlingtida har ho i tillegg hatt med seg elevar frå utplassering og vist ei ypparleg evne til å ta hand om og bry seg om elevane samtidig som ho med stor iver har delt sin kunnskap.
Stor interesse for faget
Lærebedrifta SR Group deler mange godord om årest lærling, og dei set pris på den gode kontakta ho har hatt til kundar og samarbeidspartnarar.
Jon Ødegård/SR Group
Sjølve fagprøva utførte ho på ein svært god måte, melder prøvenemnda. Ho var godt forberedt til prøvedagen og alt var klargjort på førehand. Ho var opptatt av å dokumentere og ha ei ryddig framferd. Prøvenemnda seier at Anniken hadde eit godt svar på alt ho blei spurt om, også på det teoretiske. Ho hadde ei stor interesse for faget og eit sterkt ønske om å bli ein god sjåfør.
SR Group i Kristiansund er lærebedrift i yrkessjåførfaget gjennom Transportbransjens opplæringskontor.
Kontakt
Bjørnar Loe
Seksjonsleiar
Telefon: 92086609/ 71280306