Med kritisk låg bemanning og eit uløyst effektiviseringskrav på 2,5 millionar kroner, er det ikkje lenger forsvarleg med jamne kutt. I staden må innsatsen konsentrerast om lovpålagde oppgåver og tiltak med høg samfunnsverdi.
I saksframlegget til kultur- og folkehelseutvalet blir det slått fast at prioriteringane vil gi meir målretta ressursbruk, men også føre til svekka fagleg støtte til kommunane, tap av utviklingsmoglegheiter for eit stort mangfald av aktørar i fylket og manglande leveransar på lovpålagde oppgåver.
Følgande blir foreslått nedprioritert:
- Plan- og byggesaker med låg regional verdi
- Statlege tilskotsordningar som ikkje er forskriftsfesta og har kort varigheit
- Langsiktig utviklingsarbeid innan arkiv, språk, film og frivilligheit
Følgande blir foreslått prioritert:
- Lovpålagde oppgåver innan kulturmiljø, bibliotek, friluftsliv og folkehelse
- Tenester med dokumentert effekt, som Den kulturelle skolesekken og Ung Kultur Møtes
- Tilskotsordningar med høg samfunnsverdi og lang varigheit
Omfattande konsekvensar
Konsekvensane av nedprioriteringane er omfattande. Kommunane får mindre fagleg støtte og må i større grad stå aleine i kommunalt planarbeid og utviklingsprosjekt. Kulturaktørar og frivillige mister tilgang til ressursar og samarbeid, og fylkeskommunen risikerer å miste tillit som fagleg støttespelar. I tillegg kan manglande rettleiing og kapasitet føre til tap av kulturminne.
Fylkeskommunedirektøren innstiller på at kultur- og folkehelseutvalet støttar tilrådinga, og tek til vitande at prioriteringane vil gå ut over kvalitet, tilbod og vidare utvikling innan kulturområdet.
Møteinnkalling og saksframlegg for kultur- og folkehelseutvalet måndag 10. november