Magnus Hjelmstad er tilsett som ny økonomisjef i Møre og Romsdal fylkeskommune.
Privat / Møre og Romsdal fylkeskommune
Hjelmstad er utdanna siviløkonom ved Norges Handelshøyskole og University of Strathclyde (Glasgow/Skotland).
Sidan 2013 har han vore tilsett ved Omya Hustadmarmor AS i Elnesvågen og har stillinga Head of Operational Controlling Europa. Stillinga inneber det overordna ansvaret for all operasjonell controlling-aktivitet i Omya-konsernet sin Europa-divisjon. Her har han hatt ansvar for blant anna budsjetteringsprosessar, finansielle prognosar og kostnadsoppfølging.
Hjelmstad har også bakgrunn som revisor frå KPMG AS, og som børsmeklar og plasseringsansvarleg ved Handelsbanken Capital Markets og Handelsbanken Ålesund.
Han seier at han ser fram til å begynne som økonomisjef i Møre og Romsdal fylkeskommune:
– Eg har eit personleg ønske og ambisjon om å ta direkte del i samfunnsmessig og regional verdiskaping og vekst. Og så skal eg røpe at fokuset på omstilling i fylkeskommunen, og det å møte samfunnet sine framtidige behov, appellerer til meg, seier Hjelmstad.
Hjelmstad er busett i Molde med sambuar og tre barn. Han startar i jobben august 2025.
– Vi ser fram til at Magnus Hjelmstad startar som økonomisjef. Vi er trygge på at den breie erfaringa han har vil bidra positivt til fylkeskommunen si framtidige økonomiske styring, seier assisterande fylkeskommunedirektør Gunn Randi Seime.