Tunellen mellom Korsmyra og Indreeide er ferdig og opnar for midlertidig bruk.
Else Britt Ervik
Alt utstyr som sikrar tryggleiken i den vel 4,8 kilometer lange tunellen mellom Korsmyra og Indreeide i Fjord kommune og Stranda kommune er på plass og fungerer. Tunellen manglar likevel enno formell godkjenning, og Møre og Romsdal fylkeskommune har søkt Vegdirektoratet om bruksgodkjenning slik at tunellen kan opnast for normal trafikk. Dette er ein omfattande prosess. I mellomtida kan ein oppleve at fv. 63 Korsmyra-Indreeide blir stengd på grunn av skred eller skredfare, samstundes som tunellen står ferdig.
Fylkesvegsjefen er tunellforvaltar og kan avgjere ei midlertidig opning om tryggleiken er ivaretatt.
-Det er gjort ei risikovurdering, tunellen er ferdig testa, og lokalt brannvesen er øvd på hendingar i tunellen. Vi vil med bakgrunn i dette opne tunellen i dei tilfella vi må stenge Indreeidsdalen no i vinter, seier fylkesvegsjef i Møre og Romsdal fylkeskommune, Ole Jan Tønnesen.
Slik kan Geirangerbygda og besøkande få trygg heilårsveg forbi dei 13 skredpunkta gjennom Indreeidsdalen frå i år. Denne opninga føreset at vi alle brukar tunellen på ein trygg måte.
-Vi følgjer med på fartsnivået i tunellen, og ser vi uvettig bruk, kan vi ikkje halde fram med denne unntaksordninga. Dette får vere den einaste peikefingeren i dette som er ei skikkeleg gladsak, seier Tønnesen.
Utanom desse høva, er Indreeidstunellen stengd til fylkeskommunen har mottatt bruksgodkjenninga frå Vegdirektoratet.
Fylkeskommunen vil kome tilbake til tidspunkt for endeleg opning av tunellen.
Kontaktperson
Ole Jan Tønnesen, fylkesvegsjef, telefon 920 29 592