Samferdselsutvalet vedtok torsdag 10. september at Møre og Romsdal fylkeskommune skal søke om tilskot gjennom den utvida statlege ordninga for reduserte prisar på periodebillettar.
245 kroner billegare sidan april
For ein vaksen som reiser i éi sone, blir prisen redusert frå 777 til 632 kroner. FRAM Ung blir redusert frå 418 til 273 kroner.
– Når mange opplever at kvardagen blir dyrare og har utgifter til både drivstoff og bompengar, er det positivt at vi kan sette ned billettprisane. Vi håper at endå fleire vel kollektivtransport, seier marknadssjef i FRAM Toril Karlsnes.
Fleire kjøper periodebillettar
Prisreduksjonen som blei innført i april, har blitt følgd av ein vekst på 15 prosent i salet av periodebillettar samanlikna med same periode i fjor.
Prisreduksjonen er truleg ein viktig del av forklaringa. Utviklinga heng også saman med vekst i FRAM Ekspress og auka kollektivtrafikk i Ålesundsområdet.
Statleg tilskotsordning
Prisreduksjonen blir mogleg gjennom ei statleg tilskotsordning som skal gjere kollektivtransporten meir attraktiv og få fleire til å reise kollektivt.
Fylkeskommunedirektøren skal no sende søknaden til Jernbanedirektoratet og gjennomføre nødvendige endringar i prisar, salsløysingar og kundeinformasjon.
Tilskotsperioden varer frå 1. november 2026 til 30. april 2027. Dersom staten ikkje vidarefører ordninga etter dette, må prisnivået på periodebillettane vurderast i arbeidet med økonomiplan og budsjett.
Les vedtaket frå samferdselsutvalet 10. september