EU-nettverket skal utvide horisonten mot Europa

Trude Carlsen er prosjektleiar EU-nettverk Møre og Romsdal. Per-Kristian Bratteng

Det skjer på ein workshop på InnbyggerLaben Innom i Molde torsdag 18. januar. Målet med ei felles arbeidsøkt er å stake ut kursen for kva EU-nettverk Møre og Romsdal skal vere for at fleire regionale aktørar skal være aktuelle partnarar i Horisont Europa-prosjekt.

Forventar samarbeid med Europa

Næringssjef Hilde Aspås seier at ved å kanalisere forskings- og innovasjonsmidlar via Horisont Europa, har Stortinget signalisert ei forventning til norsk næringsliv og offentleg sektor om at vi skal samarbeide med Europa for å løyse felles samfunnsutfordringar:

– EU-nettverket i Møre og Romsdal skal legge til rette for at dei regionale aktørane i fylket skal ha større moglegheiter for å delta i utviklingsprosjekt i Horisont Europa. Dette er særleg viktig i ein situasjon der det blir færre nasjonale og regionale verkemidlar, og vi må skaffe ekstern finansiering frå EU-program for å bidra til utvikling av eit internasjonalt konkurransedyktig næringsliv og ein innovativ offentleg sektor, seier Aspås.

– På workshopen skal vi avklare behov og forventingar som deltakarane har til nettverket, finne ut korleis nettverket skal jobbe for å møte deltakarane sine behov, og til slutt utarbeide ein handlingsplan for aktivitetar/tilbod som nettverket skal tilby, seier næringssjef Hilde Aspås i Møre og Romsdal fylkeskommune.

Blant sju regionale nettverk

EU-nettverk Møre og Romsdal er finansiert av Forskningsrådet og Innovasjon Norge, og nettverket er blant sju regionale nettverk og åtte tematiske nettverk som har fått støtte.

EU-nettverket skal blant anna

• legge til rette for at aktørane får auka kunnskap til moglegheitene for å vere med i Horisont Europa
• rettleie på konkrete problemstillingar og prosjektidéar
• kople regionale aktørar på andre relevante nasjonale- og internasjonale miljø
• legge til rette for kunnskapsdeling og samarbeid mellom aktørar i regionen