Målet med prosjektet er å gi ungdom arbeidserfaring, kompetanse i ungskogpleie og innsikt i skogbruk som karriereveg.
Erik Birkeland, Tingh / Møreog Romsdal fylkeskommune
Kompetanse- og næringsutvalet har einstemmig støtta prosjektet Job:U Møre og Romsdal 2025–2027 med 750.000 kroner. Det er Skogselskapet i Møre og Romsdal som står bak det treårige prosjektet.
Målet er å gi ungdom arbeidserfaring, kompetanse i ungskogpleie og innsikt i skogbruk som karriereveg. Ungdommane skal jobbe i lag på fire med ein arbeidsleiar. Alle må sertifiserast for bruk av ryddesag og få opplæring i sikkerheit, teknikk og grunnleggande skogbruk. Prosjektet dekker verneutstyr for nye deltakarar.
Samarbeid
Det blir samarbeid med kommunar, skolar og næringsaktørar. Kommunane bidreg med oppdrag og kontakt med skogeigarar. Naturbruksskulane på Tingvoll og Gjermundnes stiller med lokale og utstyr, medan Skogkurs står for kursing og arbeidsleiing.
Skognæringa sysselset om lag 25.000 i Noreg, og det er stort behov for rekruttering. Prosjektet skal auke interessa for skogbruk og grøn utdanning, og sikre framtidig arbeidskraft.
Totalkostnaden er 2.385.000 kroner over tre år. Finansieringa kjem frå fylkeskommunen, kommunale rentemidlar, Statsforvaltaren, fakturert arbeid, sponsorar og nasjonalt Job:U.
Auke lokal rekruttering
Prosjektet skal auke lokal rekruttering og verdiskaping i skogbruket ved å tilby sommarjobb til ungdom. Det skal også styrke interessa og kunnskapen om skog- og naturbruk, med mål om at fleire vel grøn utdanning.
Pengane er løyvd frå den statlege tilskotsordninga, Regionale tilretteleggingsmidlar i landbruket, som fylkeskommunen forvaltar.
Saksliste, saksframlegg og møteprotokoll for kompetanse- og næringsutvalet 8. mai