Får nær 20 millionar frå Erasmus+: Gir elevane internasjonal erfaring

Surnadal vgs hadde i fjor besøk frå Irland; Midleton CBS i Cork. Ellen Barret

11 vidaregåande skolar i fylket er akkrediterte (søker sjølve), og har fått slik støtte:

8,5 mill. kr. til fylkeskommunen

Møre og Romsdal fylkeskommune får 774.407 Euro, som er cirka 8,5 millionar kroner. Pengane kan alle vidaregåande skoler i fylket nyte godt av.

– Midlane skolane og fylkeskommunen får betyr at hundrevis av elevar og lærarar får reise ut i Europa for å lære, seier internasjonal rådgivar Kristian Severeide i Møre og Romsdal fylkeskommune.

Fleire skolar i fylket blir del av Erasmus+. Og etter pandemien har samarbeidet med europeiske skolar auka igjen:

– Kvart år får vi nye akkrediterte skolar. Det viser stort engasjement og eit ønske om å vere med på moglegheitene som Erasmus+ gir, seier Severeide.

– Gull verdt

Rektor Hilde Andersen ved Surnadal vgs seier ordninga har stor verdi. Surnadal vgs er ikkje direkte akkreditert, men får midlar gjennom Møre og Romsdal fylkeskommune:

– Erasmus+ er gull verdt, ikkje berre for opphalda, men også for ringverknadene. Elevane reiser mellom anna til Berlin og Cork, og helseelevar har praksis i Malta. Dette gir elevar og tilsette kunnskap om yrkesliv og samfunn i eit globalt perspektiv. Det er viktigare enn nokon gong i dagens verdsbilete, seier Andersen.

Gir vekst og motivasjon

Ved Romsdal vgs ser dei klare effektar, ifølgje fagleiar og internasjonal koordinator Arne Mittet:

– Elevane får fagleg utvikling og personleg vekst. Dei blir meir sjølvstendige og motiverte.

Erfaring viser at Erasmus+-prosjekt aukar attraktiviteten til fleire utdanningsprogram.

– Vi har prosjekt innan fleire programområde, mellom anna helse- og oppvekstfag (HO), salg, service og reiseliv (SSR), frisør, blomster, interiør og eksponeringsdesign (FBIE), bygg- og anleggsteknikk (BA) og idrettsfag. Det gir mange elevar høve til internasjonal erfaring. Vi samarbeider med skolar i Spania, Frankrike, Italia og Sverige. Ordninga styrkar også lærarkompetansen gjennom jobbskygging og samarbeid, seier Mittet.

Strategisk viktig for yrkesfag

Ved Borgund vgs er Erasmus+ ein viktig del av utviklinga, seier rektor Roger Andre Fylling:

– Internasjonale aktivitetar er eit strategisk rom for å styrke kvaliteten som yrkesfagleg utdanningsarena. Gjennom jobbskygging og samarbeid med skolar og bedrifter får tilsette nye perspektiv på læring, danning og kva det vil seie å bli yrkesklar. Dette tek vi med tilbake til eigen skole og reflekterer i team og avdelingar, seier Fylling.

Han ser også tydeleg at internasjonale erfaringar gir elevane fagleg utvikling og personleg vekst:

– Å vere minoritet i eit anna land gir innsikt i medmenneskelegdom, samarbeid og eiga rolle i fellesskapet. Det styrkar danningsreisa og kompetansen i skolekvardagen, seier han.