Bautastein på Fiksdal, Vestnes.
Jarle Honningdal
I eit brev til NTNU Vitenskapsmuseet, som har gjort sikringsundersøkingar på Nordmøre og i Romsdal, skriv Riksantikvaren: «Riksantikvaren mener det er viktig å sikre, reparere og gjenreise bautasteinen, ikke minst av hensyn til lokalbefolkningen. Erfaringsmessig betyr denne typen kulturminner mye for folk».
Halv mill. til sikring
Riksantikvaren gir tilsegn om tilskot på inntil 494.500 kroner for sikring av bautasteinen på Naustvollen, Fiksdal. Arbeidet vil bli utført av NTNU Vitenskapsmuseet.
Møre og Romsdal fylkeskommune har i brev til NTNU Vitenskapsmuseet meldt behov for sikring av kulturminnet:
«På grunn av at bautasteinen for mange år sidan var blitt knekt, er det støypt rundt den ei to meter høg «kåpe» av betong for at den skal stå. Bautasteinen er også plassert på ein 30 cm høg sokkel, med ei kunstig steinsetting med diameter på kring 5 meter.»
Hausten 2019 fekk kulturavdelinga melding om at betongen var begynt å bli dårleg, og at ein frykta at bautaen skulle knekke på nytt. NTNU Vitenskapsmuseet synfarte bautasteinen og laga ein tilstandsrapport i 2021. Det vart då konkludert med at bautasteinen måtte sikrast straks for å unngå at han fall og vart meir skada. Møre og Romsdal fylkeskommune fekk hausten 2021 sørga for ei mellombels strakssikring av bautasteinen, men dette er ikkje ei god varig sikring.
Vil skøyte bautasteinen
Møre og Romsdal fylkeskommune meiner at ein i dette i området bør søke ei løysing å skøyte bautasteinen, der ein samtidig fjernar betongkappa og unngår bruk av betong.
Bautasteinen på Naustvollen i Fiksdal, Vestnes.
Møre og Romsdal fylkeskommune
«Steinen bør takast ned, og betongen bør fjernast før ein skøyter steinen på nytt. Her må ein nytte seg av dei erfaringane som er gjort i liknande saker, til dømes ved Langsteinen i Steigen. Steinen bør deretter førast opp på same stad», skriv Møre og Romsdal fylkeskommune i brevet til NTNU Vitenskapsmuseet.
Bautasteinen på Naustvollen i Fiksdal er 5,2 meter høg, cirka 42 cm brei og 20 cm tjukk. Han er registrert som eit automatisk freda kulturminne. Bautasteinar av denne typen stammar som regel frå folkevandringstid eller vikingtid.