Får støtte til maritim beredskapssatsing

Styringsgruppa jublar for støtte frå Møre og Romsdal fylkeskommune og Sparebanken Møre. Frå venstre: Arnfinn Oksavik, NTNU Ocean Training Centre, Kirsti Slotsvik, Åkp/GCE Blue Maritime Cluster, Ole Reinlund, Ålesund vgs, Britt Giske Andersen, Maritimt ForumNordvest og prosjektleiar, Kaj Westre, NMK. I tillegg sit Helene Hanken, Fagskolen Møre og Romsdal og Hans Petter Hildre, NTNU i styringsgruppa. Foto Sonja Gangstad Sonja Gangstad

Initiativet blei starta i 2024 etter vedtaket av Forsvaret sin langtidsplan, og har som mål å sikre nok kompetanse og kapasitet i maritim sektor, både til sivil bruk og til Forsvaret sine framtidige behov. No får prosjektet drahjelp til neste fase, med auka støtte frå både det offentlege og finanssektoren.

-Dette handlar om å sikre nasjonal beredskap. Det er allereie stor interesse og søking til maritim utdanning. Samtidig veit vi at vi samla på Campus Ålesund kan utdanne langt fleire enn i dag. Med rett koordinering kan vi bidra både til sivile og militære behov, seier Ole Reinlund, rektor ved Ålesund videregående skole.

Lyser ut prosjektstilling

Det blir no lyst ut ei prosjektstilling som skal jobbe med å utvikle dei maritime utdanningane ved NTNU, Fagskolen Møre og Romsdal, Ålesund VGS og Borgund VGS. Samtidig får Juuni Elisabeth Vatne i GCE Blue Maritime ei utvida rolle som forsvarskoordinator for den maritime klynga, mens Britt Giske Andersen på vegne av Maritimt Forum Nordvest har overordna prosjektansvar.

-Vi er svært glade for tilliten og støtta vi no får. Dette gjer det mogleg å gå frå intensjonar til handling og vi vil no kunne formalisere og konkretisere satsinga vidare. Den komplette maritime klynga i regionen vår og den kompetansen som finst her er viktig for landet vårt. No set vi fart, seier Britt Giske Andersen.

Prosjektet samlar sentrale aktørar innan maritim utdanning og næringsliv i Møre og Romsdal (sjå faktaboks). Saman representerer desse ei komplett maritim verdikjede, med ei av dei største næringsklyngene i Norge innan maritim industri, samt ein unik utdanningskompetanse innan det maritime.

Kirsti Slotsvik, direktør i ÅKP, er svært glad for den ferske støtta:

-Vi er svært glade for at både fylkeskommunen og Sparebanken Møre går i tet og ser verdien av dette initiativet. No får vi på plass ein eigen forsvarskoordinator i fylket. Parallelt samarbeider vi tett med andre nasjonale og internasjonale aktørar som jobbar inn mot forsvarssektoren. Dette kan potensielt auke marknadsmoglegheita for heile klynga.