Tryggare veg i Malmefjorden blei markert 15. mai
Sondre Ulleland
Malmefjorden har fått ei trearma rundkøyring, og nye gangvegar ved Holamyra. Mange bebuarar, politikarar og næringsliv møtte fram for å markere dette med bollar, brus og strålande sol 15 mai. Holamyra omfattar eit boligområde og eit næringsområde i vekst.
- Dette er viktige tiltak for trygg ferdsel i området, sa Jesper Wiig, samferdselsdirektør i Møre og Romsdal fylkeskommune.
Han nytta anledninga til å takke kommunen for å ha stått på for prosjektet, og for godt samarbeid. Fylkesvegsjef Ole Jan Tønnesen følgte opp med litt fakta om fylkesvegen, som har stor trafikk. Det passerar 8000 bilar i døgnet i gjennomsnitt. Han opplyste også at kostnaden for prosjektet hadde landa på 31 millionar, vel innanfor ramma. Det er Odd Småge AS som har vore entreprenør, og dei fekk mange lovord for sitt gode arbeid.
Vennskap og trygg trafikk
Sylte skule stod for det kulturelle bidraget, og stilte opp med passande songar om vennskap og trygg trafikk. Torgeir Dahl, nestleiar i samferdselsutvalet i Møre og Romsdal fylkeskommune, tok opp tråden og snakka om godt vennskap med Hustadvika kommune.
- Vi er glade for å ha fått gjennomført desse tiltaka, og det hadde ikkje vore mogleg utan godt samarbeid og bidrag frå Hustadvika kommune, sa Dahl.
- Det har vore mykje frustrasjon om trafikksituasjonen i Holamyra, og slik er det fleire stader i fylket. Her har vi saman fått til gode løysingar, sa han.
Gler seg over utviklinga vidare
Nils Christian Harnes, ordførar i Hustadvika kommune, uttalde at all utvikling av næringsområdet hadde stoppa opp utan dette prosjektet.
- Endeleg har vi levert. Trafikkflyten er noko heilt anna med rundkøyringa, sa han.
Han rosa tidlegare ordførar Tove Henøen og andre tilsette i kommunen for engasjement i saka gjennom fleire år. Lokale pådrivarar har vore avgjerande for å få på plass tiltaka, med viktige økonomiske bidrag.
- Dette hadde ikkje vore mogleg utan dykk, sa ordføraren.
- Fylkeskommunen har også vore velvillige, og dei har funne gode løysingar her i Holamyra.
Harnes klipte snora og erklærte rundkøyringa for offisielt opna, med god hjelp frå skoleelevane. Borna visste godt kvifor det var feiring.
- Her har det vore mange bilar som har krasja, fortalde dei.
No kan ein glede seg over ein tryggare kvardag og ei lysare framtid i Holamyra.