Evalueringa peikar på både styrkar og utfordringar i dagens forvaltningssystem.
Målet med forvaltningsreforma var å styrke det regionale nivået, sikre betre samordning og fremme næringsutvikling. Evalueringa bygger på intervju, dokumentanalyse og statistikk frå perioden 2020–2023.
Fylkeskommunane får anerkjenning for å ha bygd opp solide fagmiljø og for effektiv saksbehandling, særleg i kurante saker. Samarbeidet gjennom FAKS (fylkeskommunane sitt akvakultursamarbeid) vert trekt fram som ein nøkkelfaktor for kvalitet og einskapleg praksis på tvers av fylka.
Viktig samarbeidspartnar
Samtidig viser rapporten at kapasitetsutfordringar hos statlege aktørar som Statsforvaltaren og Mattilsynet fører til forseinkingar i meir komplekse saker. Det vert peika på behov for betre koordinering og ressursstyrking for å møte framtidige krav.
Næringa og kommunane gir uttrykk for at fylkeskommunen er ein viktig samarbeidspartnar, og at den regionale forankringa har gitt betre kontakt og støtte i søknadsprosessar. Likevel etterlyser fleire at fylkeskommunen tek ei endå meir aktiv rolle i å påverke rammevilkår og bidra til kunnskapsutvikling.
Oppsummering av evalueringa
NTNU Samfunnsforsking har desse avsluttande betraktningane:
- Samspelet og koplinga mellom akvakulturoppgåver og rolla som regional utviklingsaktør gir moglegheiter, ressursar og handlingsrom for å påverke havbrukssektoren og betre samfunnsutviklinga i regionen.
- God kjennskap til næringa og deira behova bidreg til aktiv og god bruk av verkemiddel frå fylkeskommunane, og gir betre moglegheit til å avvege samfunnsinteresser i søknadsbehandling om lokalitetar.
- Fylkeskommunane har vist stor måloppnåing, særleg med omsyn til leveringsevne, og samordninga gjennom FAKS har bidratt til meir effektiv og heilskapleg saksbehandling på tvers av fylka.
- Vedvarande behov for auka samhandling på tvers av forvaltningsinstansar og nivå.
- Arealstrukturen og planprosessar treng auka merksemd framover.
- Balanse mellom politisk legitimitet og nasjonal styring.
Fylkesutvalet vart orientert om evalueringa i sitt møte 26. mai.