MB «Tafjord» ved kai ved Hardanger fartøyvernsenter. Bildet er frå september 2024.
Ove Inge Skylstad
MS «Jøsenfjord» og MB «Tafjord» er begge totalskadde i brannen. MY «Faun» fekk mindre skadar. Riksantikvar Hanna Geiran omtalar hendinga som «ei svart natt for fartøyvernet».
Også ved kulturavdelinga i Møre og Romsdal fylkeskommune vart meldinga om brannen tatt i mot med tristheit.
– «Tafjord» var eit fartøy med stor kulturhistorisk betydning for Møre og Romsdal og spesielt Tafjord og Storfjorden. Det er frykteleg trist at båten vart øydelagt i brannen, seier seksjonsleiar for kulturmiljø og friluftsliv, Hilde Arna Tokle Yri.
Ho fortel at blant dei verna fartøya er det eitt freda i Møre og Romsdal, MF «Bilfergen» fra 1921, som ligg i Ålesund.
– MB «Tafjord» skulle bli det neste, som ein god representant for rute- og skyssbåtar i Noreg. Målet var at «Tafjord» skulle vere ferdig restaurert i 2027 til båten sitt hundreårsjubileum, og no ved inngangen til 2026 var det tyngste restaureringsarbeidet ferdig.
MB «Tafjord» er eigd av MB Tafjord AS i Valldal og var i ferd med å bli ferdig restaurert etter fleire år ved fartøyvernsenteret. Båten vart bygd på Vestnes i 1927 og hadde ei nøkkelrolle i rutetrafikken i den veglause bygda Tafjord. Ho vart nytta til alt frå kyrkjeskyss til isbryting, og fekk stor symbolverdi etter Tafjord-ulukka i 1934, då skredet og tsunamien tok 40 liv. «Tafjord» vart då kasta 60 meter opp på land – men vart ikkje øydelagd.
Etter tidlegare periodar som fritidsbåt kom fartøyet til Hardanger fartøyvernsenter i 2016/2017. Restaureringa nærma seg no slutten, etter fleire millionar kroner i offentlege tilskot. Blant dei som har bidrege, er Møre og Romsdal fylkeskommune, som i perioden 2021-2025 løyvde nærmare 8 millionar kroner til restaureringa.
Brannen rammar eit av dei mest erfarne fagmiljøa for tradisjonelt båtbyggjararbeid i Norden.
På nettsidene til Norsk forening for fartøyvern kan du lese meir om MB «Tafjord».
Tafjord
Ukjent/Riksantikvaren