Nedlegging av Hamnsundruta er ein del av framlegget til økonomiplan for 2026-2029, og er også ei eiga sak for samferdselsutvalet måndag 10. november.
Låg bruk, store CO2-utslepp
Bakgrunnen for nedleggingsforslaget er låg bruk, høge driftskostnadar og store CO₂-utslepp. Ruta har hatt eit gjennomsnitt på berre åtte reisande per avgang, og nær 45 prosent av turane har hatt mellom éin og fem passasjerar. I framlegget til økonomiplan går det fram at fylkeskommunen årleg sparar 25 millionar kroner med å legge ned ruta.
Hamnsundruta vart oppretta etter opninga av Nordøyvegen i 2022, og skulle erstatte den tidlegare Nordøyruta. Trass i omfattande ruteplanlegging og lokal støtte, har ikkje trafikktala vore tilfredsstillande. Fylkeskommunen peikar også på at hurtigbåt er ein kostbar og forureinande transportform, og at ei nedlegging vil kunne redusere CO₂-utsleppa med rundt 1.600 tonn årleg.
Foreslår mindre båt til Store Kalvøy
For innbyggjarane på Store Kalvøy, som i dag har eit godt kollektivtilbod via Hamnsundruta, foreslår fylkeskommunedirektøren ei mindre lokal båtrute med eit fartøy tilpassa øya sine behov.
Ved ei nedlegging vil det vere behov for å styrke busstilbodet i området. Fylkeskommunedirektøren ser føre seg ei ny bussrute frå Finnøya-Søvik-Stette-Ellingsøya-Ålesund sentrum om morgonen, med korrespondanse til ferja på Finnøya og busskorrespondanse Stette/ Moa. På ettermiddagen vil det vere behov for to bussar i retur.
Saka frå samferdselsutvalet, og saka om økonomiplan 2026-2029, skal vidare til fylkesutvalet, før endeleg vedtak i fylkestinget i desember.
Saksliste og saksframlegg for samferdselsutvalet måndag 10. november.