Karrieredagane er store arrangement, med fleire hundre bedrifter og utdanningsutdanningsinstitusjonar på stands, og besøk frå tre tusen 10.klassingar over heile fylket – og nesten like mange foreldre.
- På Karrieredagane får ungdommane sjå og erfare kva yrke som finns i bedriftene og kva utdanningstilbod vi har i fylket. Målet er å gjere elvane tryggare i valet på vidaregåande opplæring. Vi vil gi dei karrierekompetanse til å ta gode val. Dette er jo så langt eit av dei viktigaste vala dei gjer, seierHilde Meringdal rådgivar i Møre og Romsdal fylkeskommune.
Karrieredagane på Indre Nordmøre opna rekka, i Surnadal. Den 8. september tok 40 bedrifter og opplæringsinstitusjonar i Surnadal idrettshall i mot 200 elevar frå ungdomsskular i Surnadal, Sunndal, Rindal og Heim.
Ungdomen stod i kø framfor dei mest populære standane; som reaksjonstesten til Atlanten vgs., køyretøysimulatorar, og brannvesenet, som hadde med seg ein hund.
- Eg syns ungdommane var fantastiske, dei virka så interessert i det som vart vist fram i Surnadal, seier rådgivar Meringdal.
Viktig val
Karrieredagane er eit av fleire tiltak fylkeskommunen arrangerer for å hjelpe 10. klassingane til å velje utdanningsretning og yrke.
Dagane blir arrangert før hospitering i vidaregåande skule, som blir arrangert i veke 46, slik at dei får eit betre grunnlag til å velje kvar dei vil hospitere og bli kjent med skulekvardagen.
I tillegg utarbeider fylkeskommunen informasjonsmateriell som rettleiarar, film som også er retta mot minoritetsspråklege og digitale ressursar.
Også for foreldre
Karrieredagane blir arrangert her:
• Ytre Nordmøre, 16. september, Kristiansund, Braatthallen
• Romsdal, 10. september, Molde, Akerhallen
• Søre Sunnmøre, 24. september, VCA, Volda Campus
• Nordre Sunnmøre, 30. september, Sparebanken Møre Arena, Ålesund
På dagtid er messa open for ungdom, på kvelden er foreldre og føresette invitert til å delta.