Kortare ventetid på spelemidlar til anlegg for idrett og fysisk aktivitet

Det var kultur- og folkehelseutvalet i fylkeskommunen som samrøystes vedtok fordelinga.

Tilskot går i år mellom anna til takoverbygg på isbanen i Isfjorden i Rauma, ny fotballhall i Tingvoll, aktivitetspark i Sæbø i Ørsta, og trakkemaskingarasje ved Skodje stadion i Ålesund. Det er elles løyva midlar til ei lang rekke nærmiljøanlegg som turstiar og mindre ballflater.

Færre søknadar

Det er færre søknader i Møre og Romsdal i år enn i fjor, og søknadsbeløpet for fylket på 178 mill. kroner er nesten 100 mill. kroner lågare enn i fjor. Trenden med nedgang er den same for landet samla sett.

Det blir gitt tilskot til 122 av til saman 153 godkjente søknader her i fylket, og ventetida på å få midlar går stadig ned. Den er på under eitt år i gjennomsnitt i Møre og Romsdal no.

– Gledeleg

– Det er veldig gledeleg å sjå at så mange av dei som søker om tilskot i år får tildelt midlar, seier Roger Bach, nestleiar i kultur- og folkehelseutvalet i Møre og Romsdal fylkeskommune. 

Bach viser til at så mykje som 80 prosent av søkarane som hadde ein formelt godkjent søknad får tilskot i år. Og ikkje nok med det:

– Vi har over 7 millionar kroner frå mellom anna opparbeidde renter i ordninga, og dei vil bli fordelt i løpet av hausten. Desse midlane blir heldt tilbake til ei eventuell klagebehandling er over. Det vil dermed bli fordelt over 112 millionar kroner til saman i 2026, seier Bach.

Dei som ikkje får midlar i år kan fornye søknaden sin i komande søknadsrunde.

Saksframlegg og møteprotokoll frå kultur- og folkehelseutvalet tysdag 9. juni