Fylkeskommunedirektøren vart den 12. mars kjent med at ein leverandør hadde fått oversendt prisopplysingar om ein annan potensiell tilbydar i samband med dei pågåande anbodskonkurransane om asfaltarbeid. Prisopplysningane var om eit tidlegare innlevert tilbod.
Det vart sett i verk tiltak omgåande, og vidare har mellom anna fylkesordførar og revisjonen undervegs blitt informert om saka. Dei potensielt aktuelle partane i konkurransen er og informert, og marknaden er varsla gjennom konkurranseoppfølgingsverktøyet Mercell.
Fylkeskommunedirektøren ser svært alvorleg på denne hendinga som kan påverke den planlagde dekkelegginga, og saka er meldt til politiet.
– Møre og Romsdal fylkeskommune er ein stor innkjøpsaktør, og er opptatt av profesjonalitet i slike prosesser, seier fylkeskommunedirektør Toril Hovdenak.
– Det er viktig for trafikantar og trafikktryggleiken i fylket at vi får starta så snart som mogleg med dekkelegginga som det er løyvd midlar til i 2024. Fylkeskommunen gjer no nødvendige tiltak for å få på plass kontrakt for legging av asfalt på fylkesvegane i Møre og Romsdal i 2024, seier fylkeskommunedirektøren.
Kontaktpersonar:
- Toril Hovdenak, fylkeskommunedirektør, telefon 99 04 87 28
- Jesper Wiig, samferdselsdirektør, telefon 97 58 65 33