Bak verktøyet står Ålesund kommune, som lanserte Livet&Sånn i 2020. Sidan då har det digitale læremiddelet blitt tatt i bruk i skolar og barnehagar over heile landet. Møre og Romsdal fylkeskommune støttar prosjektet som ein del av Program for folkehelsearbeid i kommunane, og er også oppdragsgivar for evalueringa som no er gjennomført.
Eit digitalt verktøy frå Ålesund skal bidra til å styrke folkehelsa for barn og unge. Dette er eit illustrasjonsbilde.
Erik Birkeland/TINGH
Brukt over heile landet – får gode tilbakemeldingar
I den ferske evalueringsrapporten frå Proba samfunnsanalyse og Folkehelseinstituttet får det digitale læremiddelet gode tilbakemeldingar.
Rapporten viser at læremiddelet er fleksibelt, lett tilgjengeleg og blir opplevd som relevant. Det er også i tråd med læreplanen og hentar inspirasjon frå ulike faglege retningar. Samtidig peikar rapporten på at læringsutbyttet enno er uvisst, og at bruken varierer mykje mellom dei ulike kommunane og skolane.
– Vi tenker det er noko av styrken med Livet&Sånn at ein kan bruke det på så ulike måtar både systematisk, men også fleksibelt, seier Jens Plathe i Proba. Evalueringa bygger på erfaringar frå tre kommunar, ni skular og ei nasjonal spørjeundersøking. I tillegg er det gjort ein gjennomgang av nettsida til prosjektet, livetogsann.no.
Livet&Sånn er utvikla i pedagogisk-psykologisk teneste i Ålesund og består av ei nettside og ein YouTube-kanal. Verktøyet er primært tenkt brukt som undervisningsmateriell for barn og vaksne i skular og barnehagar. Målet med Livet&Sånn er å styrke og fremje den psykiske helsa til barn og ungdom, slik at dei får livsmeistringsstrategiar og kunnskap om psykisk helse – noko som igjen skal bidra til auka inkludering og innanforskap. Samstundes skal vaksne få auka kompetanse i å fremje psykisk helse og livsmeistring blant barn og unge.
Livet&Sånn er utvikla og blir drifta på bakgrunn av eit lokalt initiativ med sterkt engasjement frå fagpersonar i kommunale tenester, med finansiering mellom anna frå Møre og Romsdal fylkeskommune. Arbeidet starta i barneskulane i 2020, i ungdomsskulane i 2021 og i barnehagane i 2022.
Som læreverk er Livet&Sånn strukturert i tematiske bolkar for kvar månad i skuleåret, tilpassa dei ulike trinna. Kvar bolk følgjer ein felles struktur som omfattar ein eller fleire korte introduksjonsfilmar, presentasjonsmateriell (lysbilde), oppgåver og ei lærarrettleiing som viser til kompetansemåla som blir dekte. Det er lagt til rette for både systematisk bruk og meir selektiv og fleksibel bruk.
Livet&Sånn inneheld òg materiell til årlege foreldremøte, personalkurs og tiltakspakkar mot mobbing og skulefråvær.
Evalueringa skal vise vegen vidare
Verktøyet blir brukt i barnehagar og skoler over heile landet og inneheld gratis undervisningsmateriell innan folkehelse og livsmeistring.
– Det er kjempegøy å sjå kor enormt Livet&Sånn har spreidd seg sidan 2020. Tilbakemeldingane frå brukarane er svært gode, seier prosjektleiar Anne-Hilde Lystad.
– Vi må vite at materialet held god kvalitet og at måla med programmet blir nådd, seier Rigmor Hustad Holen, seniorrådgivar i fylkeskommunen. Ho legg til at evalueringa skal gi eit godt grunnlag for vidare utvikling og framtidig drift.
Evalueringa held fram neste skoleår, da med fleire kommunar og nye deltakarar. Finansieringa av Livet&Sånn gjennom folkehelseprogrammet varer ut 2026.
Illustrasjon frå nettsida til læringsverktøyet.
Livet&Sånn
Kontaktpersonar