Midlane blir fordelt likt mellom dei tre største næringsforeningane i fylket: Næringsforeningen Ålesundsregionen, Molde næringsforum og Kristiansund og Nordmøre næringsforening.
Prosjektet har som mål å styrke regionen si evne til å tiltrekke og halde på arbeidskraft, i ei tid der kampen om kompetente arbeidstakarar blir stadig hardare. Tilskotet frå fylkeskommunen skal dekke inntil 50 prosent av prosjektkostnaden for år 2, og er gitt under føresetnad av fullfinansiering frå andre kjelder.
Satsingane
Kristiansund og Nordmøre næringsforening satsar på strategiar for rekruttering og synleggjering, mellom anna gjennom samarbeid med Kom Trainee, utvikling av kommunikasjonsstrategi og ambassadørprogram. Dei vil også etablere arenaer for dialog med tilflyttarar og utflyttarar, og samarbeide med AFF om leiarutvikling og toppleiarforum.
Molde næringsforum har ei brei satsing på karriererettleiing og ungdomsaktivitetar, som Romsdalsløypa, karrierekveldar og bedriftsbesøk. Dei etablerer også velkomsttiltak som Welcome Hub og innbyggarkontor, og profilerer regionen gjennom kampanjen «Romslige Romsdal» og digitale historier. I tillegg blir det jobba med mentorordningar og nettverk for unge arbeidstakarar.
Ålesundsregionen fokuserer på synleggjering gjennom filmprosjektet «Hjem til Sunnmøre», sosiale medier og historieforteljing. Dei vidarefører tiltak som Cowork Sunnmøre og «Velkommen HIT!», og tilbyr kurs og arrangement for utanlandske arbeidstakarar. Prosjektet inkluderer også analysearbeid som omdømmeundersøking og verdiskapingsanalyse.
Verdifullt samarbeid
Fylkeskommunen legg vekt på at samarbeidet mellom næringsforeiningane er verdifullt, og at prosjektet bidreg til å teste ut tiltak og byggje vidare på det som fungerer. Rekruttering og omdømmebygging blir omtalt som langsiktig arbeid som krev regional samhandling.
Møteprotokoll og saksframlegg for kompetanse-og næringsutvalet torsdag 18. september