Dette elementet finnes ikke lengre og vil heller ikke vises på nettsiden.
Det skal gjerast tiltak på begge kaiene i sambandet Brattvåg - Dryna, og kontrakt for arbeidet på Dryna blei lyst ut fredag 11. april.
- På Dryna ferjekai er det planlagd å bytte brubås og heisetårn, i tillegg til ein del andre oppgraderingar.
Dette fortel Hans Rune Paulsen, prosjektleiar i Møre og Romsdal fylkeskommune. Som del av prosjektet blir det også gjort tilpassingar på landarealet.
Bind saman Romsdal og Sunnmøre
Sambandet Brattvåg - Dryna er ei av ferdselsårene mellom Romsdal og Sunnmøre, og har ein gjennomsnittleg trafikk på 180 køyretøy i døgnet. Det er eit viktig samband for pendlarar til skole, arbeid og industri.
- Dei nye ferjekaiene må vere tilpassa trafikkmengde og fartøy som er forventa å bli satt inn på sambandet frå 2029, seier Paulsen.
- No satsar vi på å få inn gode anbod, og gjer oss klare til å starte arbeidet på Dryna.
Tilbodsfristen er 23. mai og planlagd oppstart hausten 2025. Arbeidet på Brattvåg ferjekai vil bli lyst ut seinare.