Plastjegerne AS
Det var kompetanse- og næringsutvalet i Møre og Romsdal som måndag vedtok einstemmig å dele ut prisen til Hegglund og Plastjegerne.
– Mona Hegglund har gjort ein formidabel innsats for å rydde opp i plastforsøpling langs kysten med målretta arbeid, engasjement og samarbeid, seier Geir Stenseth, leiar i kompetanse- og næringsutvalet. – Gjennom Plastjegerne har Hegglund vist korleis ein kan kombinere entreprenørskap med miljøengasjement, og ho har vore ein inspirasjon for frivillige, skular og lokalsamfunn. Ho er eit godt døme til etterfølging for andre, og eit forbilde for alle som vil bidra til eit reinare og meir berekraftig kystmiljø. Miljøprisen 2025 går til ein person og ei verksemd som verkeleg har teke ansvar for naturen vår og som viser at handling nytter, seier Geir Stenseth, leiar i kompetanse- og næringsutvalet.
Rydder langs kysten
Plastjegerne AS er ei lokal verksemd med fleire tilsette og båtar, og samarbeider med skular, organisasjonar og enkeltpersonar. Gjennom programmet «Rydd i tide» ryddar dei sårbare og prioriterte område langs kysten. I tillegg driv Hegglund Eco Camp Norway, som også har fokus på berekraft.
Utvalet meiner innsatsen frå Hegglund og Plastjegerne er eit godt døme på korleis lokal handling kan ha stor betydning for naturmiljøet. Smøla er ein hotspot for plastforsøpling, og arbeidet deira har både lokal og nasjonal verdi.
Blir delt ut i fylkestinget
Miljøprisen blir delt ut av fylkesordføraren under fylkestinget i desember. Prisen består av diplom, eit kunstverk frå ein lokal kunstnar og 15.000 kroner.
Gjennom programmet «Rydd i tide» ryddar Plastjegerne AS sårbare og prioriterte område langs kysten.
Plastjegerne AS
Tidlegare vinnarar av Miljøprisen i Møre og Romsdal er:
2024: Friluftsråda i Møre og Romsdal
2023: Hogstein Agro
2022: Nordic Wildfish
2021: Gomalandet SFO
2020: Vartdal Plast AS
2019: Ulrik Sandøy Sørensen
2018: Sødahlhuset
2017: Plastfritt Giske
2016: Smøla Klekkeri og Settefisk AS
2015: Stranda Prolog AS
2014: Naturvernforbundet Møre og Romsdal
2013: Standal knuseverk AS
2012: Alv Ottar Folkestad
2011: NORSØK
2010: Olav Bye
2009: Runde Miljøsenter