Utdeling av miljøprisen for 2023. Frå venstre leiar av kompetanse- og næringsutvalet Geir Stenseth, prisvinnar Odd Christian Stenerud i Hogstein Agro, Olav Martin Synes Norsk Landbruksrådgiving, Iver lande Kvalsvik, Epax og fylkesordfører Anders Riise.
Per-Kristian Bratteng
Stenerud og hans verksemd Hogstein Agro får prisen for å ha utvikla eit produkt som er basert på avfall frå fiskerinæringa, og som reduserer behovet for kunstgjødsel i landbruket.
– Eg trur dette vil bety mykje for mange bønder når dei oppdagar både moglegheita til å spare 40 prosent av kostnadane, og at klimaavtrykket blir redusert med 80 prosent, seier Odd Christian Stenerud i videointervjuet.
Leiaren av kompetanse- og næringsutvalet, Geir Stenseth, sa under prisutdelinga at årets vinnar av prisen gir det historiske omgrepet fiskarbonden eit nytt og spennande liv, med satsing på utnytting av restråstoff frå lokal marin oljeproduksjon.
- Dette er ei lovande produktutvikling og ei miljøsatsing der fiskerinæringa og landbruksnæringa samvirker med lokale aktørar for utnytting av restråstoff til gjødsel for landbruket, sa Stenseth.