Bildet er frå Sykkylven vgs.
Erik Birkeland/Tingh
Det viser Kvalitetsmeldinga 2026, som gir ei samla vurdering av kvaliteten i den vidaregåande opplæringa i Møre og Romsdal. Meldinga er no lagt fram til politisk behandling.
Samla har gjennomføringa fem/seks år etter skolestart auka frå 82,8 prosent for 2018-kullet til 83,2 prosent for 2019-kullet. Møre og Romsdal er framleis blant fylka med høgast gjennomføring i landet.
Møre og Romsdal hadde også den høgaste delen elevar som fullførte og bestod skoleåret 2025–2026.
Best i landet på yrkesfag
Resultata er særleg gode innan yrkesfag. 74,5 prosent av 2019-kullet på yrkesfag i Møre og Romsdal har gjennomført vidaregåande opplæring. Det er best av fylka og 3,4 prosentpoeng over landssnittet på 71,1 prosent.
Gjennomføringa på yrkesfag har auka med 0,4 prosentpoeng samanlikna med 2018-kullet. På landsbasis er snittet stabilt på 71,1 prosent.
– Vi skal vere stolte av at vi er best i landet på gjennomføring i yrkesfag, og at mange av ungdommane våre vel yrkesfag. Samtidig må vi lykkast betre med å få fleire frå Vg2 over i læretid. Skal vi utdanne fleire fagarbeidarar, må fleire fullføre løpet fram mot fagbrev. Det treng både næringslivet og offentleg sektor i Møre og Romsdal, seier kompetanse- og næringsdirektør Erik Brekken.
Fråværet går ned
Også elevfråværet går i positiv retning. Etter ein markant auke dei tre føregåande skoleåra gjekk fråværet ned i 2025–2026. Det er også lågare enn i 2022–2023.
Elevane i Møre og Romsdal hadde eit gjennomsnittleg totalfråvær på 6,2 prosent, mot 6,9 prosent nasjonalt. Berre Rogaland hadde lågare fråvær, medan Trøndelag låg på same nivå.
Fråværet er likevel framleis høgare enn før pandemien.
Mindre mobbing på Vg1 og Vg3
Også tala for læringsmiljø viser ei positiv utvikling på fleire område. På Vg1 og Vg3 er det færre elevar som rapporterer om mobbing enn året før. På Vg2 er delen uendra.
Delen som opplever mobbing, går ned med stigande årstrinn. På Vg1 rapporterer 6,0 prosent om mobbing, mot 5,5 prosent nasjonalt. På Vg2 er delen 5,1 prosent, mot 5,2 prosent nasjonalt. På Vg3 er delen nede i 2,2 prosent, mot 3,7 prosent nasjonalt.
Tala viser dermed framgang, men også ei utfordring på Vg1, der fleire opplever mobbing enn på landsbasis.
Økonomien utfordrar kvalitetsarbeidet
Gode resultat betyr ikkje at kvaliteten kan takast for gitt. Den økonomiske situasjonen legg press på kvalitetsarbeidet og handlingsrommet for å følge opp elevane. Fylkeskommunen må derfor prioritere ressursane godt for å bevare kvaliteten i opplæringa.
Det er også eit viktig bakteppe når fylkespolitikarane no skal behandle Kvalitetsmeldinga.
Meldinga skal først til yrkesopplæringsnemnda og deretter til kompetanse- og næringsutvalet måndag 9. november. Saka går vidare til fylkesutvalet og fylkestinget 8. og 9. desember.
Saksframlegg for yrkesopplæringsnemnda 5. november
Lenke til Kvalitetsmeldinga 2026