Fylkeskommunedirektøren legg i dag fram si endelege innstilling i saka om ny skole- og tilbodsstruktur 2026-2040.
Terje Aamodt / Møre og Romsdal fylkeskommune
Fylkeskommunedirektøren innstiller også på at fleire skolar får endra utdanningstilbod. Samstundes blir det understreka at strukturen må vere fleksibel så ein er betre rusta til å omstille seg raskt ved behov.
Det går fram av saka Ny skole- og tilbodsstruktur 2026-2040, som i dag blir lagt fram for politiske råd og utval. Fylkestinget avgjer saka 9.-10. desember.
Bedriftsmodellen skal sikre lokale tilbod
I tillegg til samanslåingane, innstiller fylkeskommunedirektøren på å innføre ein bedriftsmodell for begge skolane. Formålet med Bedriftsmodellen i Stranda og Tingvoll er å sikre lokalt yrkesfagtilbod og læreplassar der elevgrunnlaget er for svakt til å halde oppe ordinære klassar.
Bakgrunnen for saka er ein nedgang i elevtalet på rundt 20 prosent fram mot 2040. Den vidaregåande opplæringa må tilpassast framtidige generasjonar, og i desember 2024 vedtok fylkestinget at ny skole- og tilbodsstruktur må utgreiast.
Ny vurdering etter høyring
Då saka blei lagt ut på høyring i sommar, vurderte fylkeskommunedirektøren mellom anna å legge ned både Stranda vgs og Tingvoll vgs. Etter høyringa, der det kom inn 134 svar, har fylkeskommunedirektøren gjort ei ny vurdering og lagt stor vekt på distriktsomsyn og lokale innspel.
Innstillinga er ei langsiktig tilpassing til nedgang i elevtal og økonomiske rammer – «dette er ikkje ei sparesak for kortsiktig gevinst», skriv fylkeskommunedirektøren.
Førebur nye tiltak før 2040
Fylkeskommunedirektøren konkluderer med at ein må vere klar til å gjere nye vurderingar og justeringar i perioden 2026–2040. I den politiske saka blir det foreslått utviklingstiltak som samarbeid mellom skolar, felles planlegging og fleksible opplæringsløp, noko som skal førebu slike grep.
Saka om ny skole og tilbodsstruktur skal først til politisk behandling i yrkesopplæringsnemnda måndag 3. november, og du kan lese saksframlegget i møtedokumenta for nemnda.