Ordninga skal hjelpe aktørane med å utvikle prosjektidéar og førebu søknadar til EU-program.
Mange gode idéar stoppar opp før dei blir til søknadar. Derfor har fylkeskommunen etablert ei tilskotsordning for internasjonale forprosjekt.
Å bygge nettverk, finne rett kompetanse og utvikle ein konkurransedyktig søknad krev ofte mykje tid og ressursar. Med støtte til forprosjekt vil fylkeskommunen redusere risikoen og senke terskelen for å komme i gang.
Får hjelp i tidleg fase
– Vi vil gi aktørar i Møre og Romsdal starthjelp i den tidlege fasen, når idear skal utviklast, partnarar finnast og prosjekt formast, seier Ingrid Gjelsvik, internasjonal rådgivar i Møre og Romsdal fylkeskommune.
Ordninga er retta mot aktørar som vil utforske moglegheitene i internasjonale samarbeids- og finansieringsprogram.
Hjelp til offentleg finansiering
Målet er fleire prosjekt frå Møre og Romsdal som kan få finansiering gjennom EU-program og få til meir samarbeid mellom regional og internasjonale aktørar.
Fylkeskommunen oppmodar aktuelle søkarar til å vurdere ordninga som eit første steg mot større prosjekt og internasjonal finansiering.
Les meir om tilskotsordninga på fylkeskommunen sine nettsider.