No blir det gjort tiltak for sjøauren i Mausaelva.
Else Britt Ervik
Den nye fisketrappa – eller tersklar, som det heiter i fagspråket – blir bygd under kulverten ved fylkesveg 657. Her har fisken tidlegare møtt hinder som følge av menneskeskapte inngrep i elva. No blir det etablert fleire små kulpar som gir fisken både kvileplassar og moglegheit til å ta seg vidare oppover elva.
Tersklane fungerer som ei trapp av små basseng. Slik etterliknar dei naturlege forhold og gjer det mogleg for sjøauren å forsere ei krevande strekning.
Kritisk situasjon for sjøauren på Sunnmøre
Sjøauren er hardt pressa av ei rekke truslar, både i sjø og ferskvatn. Vandringshinder, kanalisering, drenering, fysiske inngrep, lakselus og forureining påverkar bestanden negativt. Ifølge Vitenskapleg råd for lakseforvaltning er tilstanden for sjøaure mange stader i landet kritisk. På Sunnmøre er situasjonen særleg alvorleg, då ingen vassdrag i regionen oppnår god tilstand.
Tiltak som fisketrappa i Mausaelva er derfor viktige for å snu ein negativ trend.
- Trappa som no kjem på plass, gir sjøauren ei samanhengande vandringsrute mellom fjorden og viktige oppvekst- og gyteområde i elva. Det styrkar heile økosystemet i Mausaelva, seier avdelingsingeniør Katrine Lødemel Vedeld i Møre og Romsdal fylkeskommune.
For at fisken skal få optimale forhold heilt opp til Mauseidvatnet, vil det på sikt vere behov for ytterlegare to slike installasjonar. Men allereie denne første trappa vil vere viktig for den lokale sjøaurebestanden.
Ein del av eit større miljøarbeid
Prosjektet er eit ledd i Møre og Romsdal fylkeskommune sitt arbeid med å nå miljømåla for vassdrag. Liknande tiltak er gjennomførte fleire stader langs fylkesvegane, mellom anna i Råkvassdraget på Smøla.
Avdelingsingeniør Katrine Lødemel Vedeld.
Else Britt Ervik
Fisketrappa er viktig for den lokale sjøaurebestanden.
Else Britt Ervik