Kai Bedringås
Tala kjem fram i ein rapport frå NIBIO (Norsk institutt for bioøkonomi).
Møre og Romsdal fylkeskommune har bestilt ei oppdatering av verdiskapingsanalysa for landbruket. NIBIO har no rekna på nytt med tal frå 2024, og samanlikninga mot 2020 viser ei tydeleg endring i kor verdiane kjem frå.
Samla verdiskaping frå landbruk og landbruksbasert industri i fylket er 3.256 mill. kroner i 2024. I 2020 var tilsvarande sum 2.547 mill. kroner. Det er ein auke på 709 mill. kroner.
Landbruket opp, industrien litt ned
Oppgangen kjem i hovudsak i sjølve landbruket: Verdiskapinga i jordbruk, skogbruk og landbruksbaserte tilleggsnæringar er 2.142 mill. kroner i 2024, mot 1.373,9 mill. kroner i 2020. Samtidig har landbruksbasert industri gått ned frå 1.173,1 mill. kroner i 2020 til 1.114 mill. kroner i 2024.
NIBIO-tala viser også at næringa sysselset 2.358 personar i fylket i 2024 (jordbruk, skogbruk og landbruksbasert industri).
Kommunane i 2024
Størst verdiskaping totalt har Stranda (504 mill. kroner), Hustadvika (356 mill. kroner) og Ålesund (307 mill. kroner). Størst på jordbruk er Hustadvika (225,5 mill. kroner), medan Stranda er klart størst på landbruksbasert industri (420,1 mill. kroner).
Landbruket i Møre og Romsdal er i stor grad basert på gras- og beiteressursar. Husdyrhald – særleg mjølkeproduksjon – står for den største delen av verdiskapinga i fylket.