Dårleg vegdekke, manglande drenering, svakt rekkverk og redusert bereevne på vegar og bruer aukar risikoen for ulykker og manglande framkome.
Erik Birkeland/TINGH
Når fylkeskommunedirektøren legg fram status, konsekvensar og moglege tiltak for å bremse forfallet, går det fram at forfallet har bygd seg opp over tid, og at kostnaden for å ta igjen etterslepet er berekna til minst 17 mrd. kroner.
Aukar med halv mrd. i året
Dagens økonomiske rammer er ikkje tilstrekkelege til å halde vegnettet i noverande tilstand. Manglande midlar gjer at vedlikehaldsetterslepet aukar med om lag 500 mill. kroner kvart år. Dette får konsekvensar for trafikksikkerheit, framkome, beredskap og verdibevaring av vegkapitalen.
Dårleg vegdekke, manglande drenering, svakt rekkverk og redusert bereevne på vegar og bruer aukar risikoen for ulykker og manglande framkome. Forfallet fører òg til fleire restriksjonar, innsnevringar og stengingar, noko som særleg rammar næringstransport, kollektivtrafikk og beredskap i område med få omkøyringsruter.
Foreslår programmet «På god veg»
For å møte utfordringane foreslår fylkeskommunedirektøren eit nytt vegfornyingsprogram for fylkesvegnettet, kalla «På god veg». Programmet skal gi utvalde strekningar eller område eit samla løft, slik at vegen blir god nok når det gjeld bereevne, dekke, sikt, rekkverk, veglys og framkome.
Fylkeskommunen har i førre NTP-prosess spelt inn behovet for ei satsing på fylkesvegane i Norge på 5 mrd. Dette programmet synleggjer korleis ein faktisk kan redusere etterslepet i Møre og Romsdal.
Skalerbart program
Vegfornyingsprogrammet er skalerbart ut frå storleiken på løyvingar, men dersom ein skal etablere eit slikt program må det settast av minst 100 mill. kroner årleg, i tillegg til eksisterande løyvingar. Samferdselsutvalet blir tilrådd å ta orienteringa til vitande og be om eit konkret forslag til innhald og omfang av vegfornyingsprogrammet. Eventuelle økonomiske prioriteringar vil bli behandla i samband med komande økonomiplanar og budsjett.
Møteinnkalling, saksliste og saksframlegg for samferdselsutvalet måndag 11.-12. mai