40 deltakarar frå 13 kommunar i Møre og Romsdal deltok på seminaret.
Solveig Stornes
9. januar samla 40 deltakarar frå 13 kommunar i Møre og Romsdal seg for å lære meir om korleis dei kan nytte anskaffingar enda meir strategisk og effektivt. Arrangør var Møre og Romsdal fylkeskommune saman med DFØ (Direktoratet for forvaltning og økonomistyring), OFA (Offentlege Anskaffingar for Agder) og LUP (Leverandørutviklingsprogrammet). Målet var å styrke kommunane si kompetanse innan strategisk bruk av anskaffingar som verkemiddel for berekraftig utvikling. Seminaret gav deltakarane praktiske verktøy og innsikt i korleis anskaffingar kan bidra til smartare ressursbruk, betre samfunnsansvar og innovasjon.
Erfaringsdeling og samarbeid
Blant bidragsytarane på seminaret var Sturle Hamre frå OFA. Han delte erfaringar frå korleis 25 kommunar i Agder samarbeider om felles anskaffingar for å oppnå betre resultat for alle.
– Samarbeid er nøkkelen til suksess. Gjennom felles anskaffingar kan vi oppnå gevinstar som ingen av oss ville klart aleine, understreka Hamre.
Oppfølging av OECD-rapporten
Arbeidet med offentlege anskaffingar er ein del av oppfølginga av OECDs rapport om sirkulærøkonomi i Møre og Romsdal. Rapporten framhevar at offentlege anskaffingar kan spele ei nøkkelrolle i å oppnå omstilling, men at det krev tettare samarbeid mellom kommunar, privat sektor og ulike næringar.
– Offentlege anskaffingar har eit enormt potensial for å drive utvikling og innovasjon, sa Marte Otterdal Drageset frå DFØ under seminaret.