Kystekspressen til kai i Kristiansund
Kai Bedringås
Målet er å få inn kunnskap, erfaringar og synspunkt frå kommunar, innbyggarar, næringsliv og andre som blir påverka av ruta. Høyringsfrist er 15. august 2026.
Møre og Romsdal fylkeskommune og Trøndelag fylkeskommune samarbeider om hurtigbåtruta Kristiansund-Trondheim. Etter gjeldande avtale dekker Møre og Romsdal fylkeskommune i dag om lag to tredelar av kostnadane til drift av Kystekspressen.
Fire alternativ skal vurderast
I høyringa ber fylkeskommunen om innspel til fire ulike alternativ for ruta:
a) Vidareføring av dagens rutetilbod
b) Omlegging av rutetilbodet
c) Avvikling av rutetilbodet og vriding til andre transportløysingar
d) Auke i rutetilbodet
Høyringa skal gi eit betre grunnlag før saka blir lagt fram for ny politisk behandling.
Ønsker gode innspel
– Vi ønsker å få gode innspel. Før politikarane behandlar saka vidare, er det viktig å få fram kva behov ruta dekker i dag, og kva konsekvensar dei ulike alternativa gir, seier samferdselsdirektør Jesper Wiig.
Dialogmøte med kommunane
Som del av høyringa blir det lagt opp til dialogmøte med kommunane i Møre og Romsdal. Møta skal gi kommunane anledning til å dele eigne vurderingar og kunnskap om dei lokale og regionale transportbehova.
Her gir du innspel
https://mrfylke.no/tenester/hoyringar/
Høyringsinnspel må sendast innan 15. august 2026.
Etter høyringa går fylkeskommunen gjennom innspela. Saka blir deretter lagt fram for ny politisk behandling. Dagens rutetilbod går som normalt medan høyringa pågår.